Shillong, Lber 07
Ka Department of History bad Central Library jong ka Sankardev College Shillong ki la pynlong ïa ka Inter- College Quiz Competition. Ïa kane ka jingïakob la ai jingïarap lyngba ka Chief Minister Youth Development Scheme (CMYDS) 2023-24.
Ka St. Anthony’s College, kaba la mihkhmat da u Kaushik Migom Pegu bad ka Damaphi F. Lamin, ki la long kum ki nongjop ha kaba ki la ïoh ïa ka khusnam da ka song pisa T.5,000, ka K.L. Bajoria College ka la wan ba ar ïa kaba la mihkhmat da u Keneth Ralsun bad u Dondor Aryan Nongrum ha kaba ki la ïoh ïa ka song pisa T.4,000 bad ka Umshyrpi College kaba la mihkhmat da u Saikat Dey bad u Rishan Nongkhlaw ki wan balai bad ïoh T.3,000.
U Principal jong ka Sankardev College, Dr. E.F.P. Lyngdoh u la sam ïa ki khusnam sha ki nongjop ha kane ka jingïakob. U Aahir Saikia u la long kum Quiz Master.
Ha kane ka jingïakob la wan ban ïashim bynta da 8 tylli ki kolej kiba don ha kane ka nongbah Shillong.
