Nongstoiñ, Lber 07
Ka la long shisha ka jingjia kaba sngewsih ha kaba kawei ka longkmie ka la mynsaw jur katba u kurim jong ka pat u la shu mynsaw malu-mala na ka jingkem ding.
Ka khubor ka ong ba katei ka jingjia kem ding ka la jia tang na ka jingkum bakla ka jong ki ba ïoh pynhoit ïa ka ‘petrol’ hajan ding.
La ong ruh ba katei ka longkmie kaba la mynsaw jur ka dei ba la tip kyrteng kum ka Kong Melinda Tympuiñ (38 snem ka rta) bad u kurim jong ka pat u dei ba la tip kyrteng kum u Bah Balentin L. Marshillong (49 snem ka rta) kiba dei na ka shnong Risiang WKHD.
Ha katei ka jingjia ka Kong Melinda Tympuiñ ka la mynsaw jur na ki bynta jong ka syngkai sharum kumjuh ki kjat katba u Bah Balentin L. Marshillong uba dei u kurim jong ka, u la shu mynsaw tang malu-mala na ki bynta jong ka kjat bad mynta kitei shi kurim ki la don hapoh Civil Hospital Nongstoiñ ban shah sumar.
U Bah Balentin L. Marshillong kurim jong katei ka longkmie u la ïathuh ba katei ka jingjia ka la jia ha ka 21 tarik u Rymphang ha ka por ba ki dang don ha lyngkha trei bad ha kata ka por ki dang ïatheh ruh ïa ka ‘petrol’ ha kawei ka kor ot dieng hynrei la kum bakla ban pynhoit ïa ka petrol hajan ka ding kumta ka ding kaba klang ka la kem ïa ka kurim jong u bad ïa u kumjuh.
Ka khubor ka ïathuh ruh ba kitei shi kurim la wan ïalam bad pynpoi ha hospital da kawei ka longkmie na Nongstoiñ ryngkat ki bahaïing jong ka kiba don ïa ka mynsiem sngewsynei ïa ki namarba wat hapdeng ka jingshitom kaba jur la artaïew ki la shu thiah ha ïing ban sumar katba lah kumta mar ïa ïoh jingtip, ki la leit shaw bad ïalam noh ïa ki sha hospital.
