Shillong, Lber 07
U MLA ka Mawlai konstitwensi u la pynpaw ka jingsngewkhia halor ka rukom thung ïa ki nongai jingmut shimet bad ki nongai jingmut kynhun namar ki don shibun ki samla kiba la pyndep ha ki jingpule bapher bapher hynrei ki khlem ïoh kam kiba kynthup ïa kiba la pyndep ïa ka Engineering, MBA Graduates ne ba la pyndep ha ka Horticulture ne Agriculture.
U Bah Brightstarwell u la pynpaw ïa kane haba u la bynrap ïa ka jingkylli ha ka kynta kylli jingkylli ha ka dorbar mang tyngka kaba la long ha ka Sngi Thohdieng.
Haba jubab ïa ka jingkylli, u Myntri Rangbah ka jylla, Conrad K Sangma, u la ïathuh ba ka sorkar ka la thung haduh 39 ngut ki ‘consultant’ shimet bad ki don 69 ngut ‘consultancy firm’.
U la ïathuh ba ki don kumba 2 lane 3 percent ki samla napoh ka jylla kiba trei kum ‘consultant firm’ bad baroh ki dei kiba nabar ka jylla hynrei da ka jingai jinghikai ha kine ki san snem haduh hynriew snem ki samla napoh ka jylla ki la kynjoh kumba 30 percent bad suki-suki da ka jinghikai u don jingkyrmen ba ki samla napoh ka jylla kin sa kiew haduh 50 lane 60 percent.
Shuh shuh, u Conrad u la ïathuh haba ïadei bad ka project World Bank haba u leit ïakynduh ïa ka myntri ka sorkar India ba dei peit ïa ka tnad pla tyngka, ka la pan ïa ka Detail Project Report hapoh 48 kynta, hynrei da ka jingdon ki ‘consultant’ la lah ban phah ïa ka DPR sha ka Sorkar India haduh ba ka myntri ba dei peit ïa ka tnad pla tyngka ka la mang pisa haduh T.2400 klur.
Sa ha kawei pat ka jingkylli, u Myntri ba dei peit ïa ka tnad Revenue & Disaster Management jong ka sorkar jylla, Bah Kyrmen Shylla, u lah ïathuh ba ka sorkar ka la ai jingïarap pisa sha ka Kong Midaris Pde na ka shnong Kut kaba la kot sha ka shi lak laiphew hajar tyngka katkum ka kyndon ka SDRF.
U Myntri u la jubab ïa kane ka jingkylli ka dei ba la wanrah da u MLA ka Mawryngkneng konstitwensi, Bah Heavingstone Kharpran ha ki kynta kylli jingkylli ha ka dorbar mang tyngka kaba dang ïaid ha ka Sngi Thohdieng.
U Bah Kyrmen u la pyntip ruh ba ka sorkar kam shym la ai ka jingïarap pisa sha ka Kong Riburom Kharngi kaba la mang haduh 1 lak 30 hajar tyngka hynrei la ai noh sha ka ka Kong Helpme Kharryngi kaba dei ka trai ïing.
