Shillong, Lber 07
Kum shi bynta ka jingrakhe ïa ka sngi kyrpang jong ki longkmie bad ki kynthei ha ryngkat bad baroh shityllup ka pyrthei kaba ju pynlong ha ka 8 tarik u Lber, ka Meghalaya State Commission for Women (MSCW) ha ka 7 tarik u Lber, 2025, ka la pynlong da ka prokram pynkup burom ïa ki nongïalam kynthei bad ki longkmie kiba ju don bynta ha ka ban trei bad nohsynñiang ha ki shnong-ki thaw bad ka imlang-sahlang.
Ka phang pdeng jong katei ka prokram ka dei halor kumno ban pynsted ïa ka jingleh ïa ki kam-ki jam ne ‘Accelerate Action’ ïa kaba la pynlong ha Secretariat Wellness Centre, Additional Secretariat Building.
Ha kane ka sngi la ïadonlang da ka Chairperson jong ka Meghalaya State Commission for Women, ka Kong Ïamonlang Syiem, ka nongïohpdiang ïa ka khusnam Padmashri bad kaba dei ruh ka nonghikai barim jong ka sobjek Khasi hapoh ka Skulbah North Eastern Hill University (NEHU), ka Prof. Badaplin War kum ka kongsan, ka Director jong ka Social Welfare, ka Kong CD Lyngwa nalor kiwei-kiwei ki nongshah khot sngewbha.
Haba ai jingkren ha katei ka sngi kum ka kongsan, na ka liang ka Kong Badaplin War, ka la ong ba ka daw kaba la pynlong ïa ka Ri baroh shityllup ka pyrthei ban rakhe ha ka 8 tarik u Lber kum ka sngi kyrpang ïa ki kynthei ka dei halor ka jingtrei minot, ka jingtrei shitom bad ka jingïaishah jong ki ‘riew kynthei ïa ki jingeh kiba ka mad ha ka jingim.
“Ki kynthei ha ki por barim, ki mad shibun ki jingeh ha ki jingtrei-jingktah, ki longïing-longsem bad ha ka jingim kaba shimet jong ki, bad ha kane ka jingmad jong ki ïa ki jingeh ha ka jingim, ki la don napdeng jong ki kiba shim ïa kane ka sienjam ban mih shakhmat bad ban pynshai paidbah ïa ki jingeh kiba ki mad da kaba mih shakhmat ban pan ïa ka jingïada bad ban pyllait ïa ki na ka jingñiew shiliang khmat,” ong ka Prof. Badaplin.
Na ka liang ka Chairperson ka Commission, ka Kong Ïamonlang Syiem, ka la pynpaw ïa ka jingsngewkmen kaba khraw bha halor ka jingdonkti jong ki ‘riew kynthei bad ki longkmie ha ka ban ai ïa ka jingshakri kaba radbah ha ki shnong-ki thaw.
Na ka liang ka Director ka Social Welfare, Kong CD Lyngwa, MCS, ka la ong ba kum ki ‘riew kynthei ki don ïa ka bor bad ka dor jong ka hynrei kum ki ‘riew kynthei haba ki ïoh ïa ka jingkyrshan na ki ‘rang khat-ar bor, ki lah ban leh kham bha shuh-shuh ïa ka kam kaba ki trei.
Ha katei ka sngi, la ïoh ruh ïa ka jingkren pynsngewthuh halor ka phang pdeng jong katei ka ka prokram na ka Kong Joy G. Syiem, ka jingpule ïa ka poem da ka samla Fenie Vanrcia Mawlong, ka jingaikhublei sngewnguh da ka Co-opted Member ka Meghalaya State Commission for Women, ka Kong Thywill Susngi.
Shuh-shuh, ha katei ka sngi ka la don ruh ka jingithuh bad ka jingpynkup burom ïa ki longkmie bad ki ‘riew kynthei kiba la trei borbah na ka bynta ka bha-ka miat hapoh ki shnong-ki thaw ïa kaba la jied hi da ki Rangbah Shnong jong ki shnong bapher-bapher.
