Shillong, Lber 07
U Myntri ba khmih ïa ka tnat Pule-Puthi ka Jylla, Rakkam A Sangma u la pyntip ba haduh 14 ngut ki briew ki la shah kem halor ka jingdonkti ha ka jingpyllait tuh ïa ki jingkylli jong ka eksamin Meghalaya Teachers’ Eligibility Test (MTET) ha u snem 2019.
Haba jubab ïa ka jingkylli u MLA ka AITC na Dedengre, Rupa Marak, u Myntri u la pyntip ba 11 ngut napdeng 14 ngut kiba la shah kem halor katei ka kam ki dei ki samla ba ïakhun ïa ka eksam MTET hi.
U Rakkam u la pyntip ba ka tyllong jong kane ka jinglait tuh ki jingkylli ïakhun eksam long nonghikai ka dei na u Program Developer bad na uwei u nongtrei jong ka NEICOM Impression Printing Press kaba don ha Guwahati.
Haba jubab shuh ïa ki jingpan jingtip u MLA ka Liang Pyrshah, u Myntri u la ong ba kane ka jinglait tuh ki jingkylli la ïoh ban bat nyngkong ha Tura Government College, West Garo Hills.
Na ka liang u Myntri u la ai ka jingkular hapoh ka ïingdorbar ba ka Sorkar kan sa shim ïa ki sienjam ba tyngeh ban pynthikna ba kum kine ki jingjia kin ym jia shuh hadien-habud.
