Nongstoiñ, Lber 09
Kam long kaba suk ba kum u briew un ïai ïoh ïa ka jingshaniah na ki longïing longsem hapoh ka shnong ka thaw. Hynrei uwei u rangbah namar ka jingshakri bad ka jingtrei hok kum u nongïalam lane u Sordar jong ka shnong ïa kaba ki paidbah nongshong shnong ki la bynshet ha u, u la lah ban ïaid lynti haduh arphew snem kynthih kum u Sordar ban peit ïa ka shnong ka thaw. Kane ka la pynlong ruh ïa ka shnong bad ïa ki paidbah nongshong shnong ba kin hap ban ai ka burom bad pynkup burom ïa u.
Une dei u Bah Yesparly Wahlang, Sordar jong ka shnong Lumpyngad ha West Khasi Hills District. Une u rangbah naduh ba u la shah jied kum u Sordar shnong u la trei shitom bad u la pyrshang katba lah ban ai ka jingshakri kaba paka ïa ki paidbah nongshong shnong ha baroh ki liang bad u la ïoh ïa ka jingieit bad ka jingshaniah na baroh ki nongshong shnong kumjuh na ki para nongsynshar jong ki shnong marjan.
Ïa kane la sakhi ruh ha ka sngi Saitjaiñ jong ka taïew ha kaba kum ka dak jong ka jingsngewnguh ïa ka jingshakri jong u ïa ka shnong ka thaw ha ki arphew tylli ki snem, ka dorbar shnong ka la ïoh ban pynkup burom ïa u kum u Sordar jong ka shnong ïa kaba la pynlong ruh ha madan jong ka shnong ha ka jingdonlang ruh u MLA ka Nongstoiñ u Bah Gabriel Wahlang kum u kongsan.
Ha kane ka sngi la pynïaid ïa ka jingïalang pynkup burom da u Bah SW Wahlang ha ryngkat ka jingïadon lang jong ki dkhot ka Executive Committee, ki Sordar barim, ki Sordar jong ki shnong marjan, ki longkmie kiba dei ki dkhot bad ki nongkitkam jong ka Village Organisation, ki samla jong ka shnong bad ki VDP.
La pynshit pynshngaiñ bad pynphuh-pynphieng ïa katei ka jingïalang da ki prokram ba kyrpang na ki longkmie bad ki jingrwai na ki samla jong ka shnong.
La ïoh jingkren na u Bah D Snaitang, Sordar barim jong katei ka shnong, na ki nongïalam jong ka VDP, Village Organisation bad na u Secretary jong ka shnong.
U MLA haba kren kum u kongsan ha katei ka sngi u la ai ka jingkhublei kyrpang ïa u Sordar uba la lah ban shakri ha kine ki arphew tylli ki snem wat hapdeng kiba bun ki jingeh ba u ïakynduh.
U la pynsngew ruh ba kum u nongmihkhmat u la pyrshang katba kot la ka bor ban noh synñiang sha ka shnong ka thaw lyngba ki skhim kiba ka Sorkar ka la mang na ka bynta ki paidbah bad u la pynsngew ruh ba u la pyrshang ban pruid dak bad u la pynsngew sha ka Sorkar ba kan shna noh ïa ka surok kaba pynïasoh na Nongrangoi sha Mawkynbat kaba la sah teng la bun bun snem.
Ha katei ka sngi ki nongïalam ka Village Organisation bad ka VWSC ki la sam ruh ïa ki khusnam sha ki longïing kiba wan nyngkong ha ka jingleh khuid bad kiba leit phah injek tista ïa ki khunlung kiba naduh dang kha haduh ba kin da dap hynriew bnai bad ïa kiba hynriew bnai haduh arsnem ha ki jaka sumar kumba la bthah da ka Sorkar lyngba ka tnat ka koit ka khiah.
