Nongpoh, Lber 09
Ki pulit ka Ri Bhoi District ha ka Sngi Saitjaiñ ki la ïoh ban kem biang ïa uwei u runar uba la lait phet na ka kti jong ki pulit ka thanat Khana-para saw snem mynshwa, kata ha ka 20 tarik jong u bnai Naiwieng 2020.
Utei u runar dei ba la tip kyrteng kum u Ranjan Borgohain na Duliajan, Dibrugarh District jong ka jylla Assam. U dei uba la shah kem teng ha ki pulit ka thanat Khanapara halor ka kam tuh kam thiem bad la pynngat ïa u ha ka kyndon 381 jong ka Indian Penal Code (IPC) ha thanat Khana-para katkum ka Case No. 52(11) 2020.
Katkum ka tyllong khubor ba la ïoh lum na ki bor pulit, la ïathuh ba hadien ka jingïoh jingtip ba utei u Ranjan Borgo-hain u la trei bylla ha kawei ka karkhana kaba don ha Perumbavoor, Ernakulam District jong ka jylla Kerala, ki pulit ka Ri Bhoi ki la pyntip mar-mar sha ki bor pulit katei ka district ban kem ïa utei u briew.
Dei ha ka 7 tarik mynta u bnai ba ki pulit ka Ernakulam District jong ka jylla Kerala ki la ïoh ban kem noh ïa utei u Ranjan Borgohain bad la aiti sha ki bor pulit ka Ri Bhoi District ha ka 8 tarik u Lber, 2025 hadien ka jingïoh jingbit na ka ïingbishar jong katei ka district bad la rah ïa u sha ïingbishar CJM ha Nongpoh ha ka Sngi U Blei.
Halor kane ka bynta, na ka liang ki pulit ka Ri Bhoi, ki la ai ka jingkhublei ba kyrpang ïa ki bor pulit ka jylla Kerala kiba la shimkhia ban leit kem ïa utei u runar uba la lait phet na kti jong ki pulit ka Ri Bhoi district saw snem mynshwa.
