Shillong, Naitung 03
U District Election Officer ka East Khasi Hills, u la bthah ïa ki Booth Level Officer (BLO) ban leit shim biang ïa baroh ki ‘Enumeration Form’ ba la sam ha ka 30 tarik Jylliew, 1 tarik bad 2 tarik Naitung namar ka la mih ka khubor kaba kynnoh ba la sam ïa ki ‘Form’ ha surok bad ha ka ïingsah jong u MLA barim ka 18-West Shillong Constituency.
U Deputy Commi-ssioner ka EKH u Abhilash Baranwal u la ïathuh, ïa kane ka jingjia la shimkhia da u District Election Officer kumjuh ki Electoral Registration Officer (ERO) ba dei khmih bad la pynlong ruh ïa ka jingleit jurip da u Assistant Electoral Registration Officers (AEROs) ha ka 2 tarik Naitung ha ïingsah une u MLA barim, ban pynshisha ïa ka jingkynnoh.
Hadien kane, la bthah ïa u BLO ban leit shimti biang noh ïa baroh ki ‘Enumeration Form’ ba la sam ha kine ki ar lai sngi ba la dep. Naduh ka 3 tarik Naitung, u AERO jong kane ka Assembly Constituency un leit ban synran dalade ïa u BLO ha ka jingsam ïa ki ‘Form’ sha ki nongthep Vote kiba dei hok bad ban khmih bniah hi dalade ïa ka jingsam ïa ki ‘Form’ haduh ban da dep ka jingpynrung kyrteng.
Ïa kane ka jingbthah la pynmih da u DEO hadien ka jingïakynduh bad ki sengsaiñ pyrthei ha ka Sngi Thohdieng ban bishar kam haba ïadei ka jingïaid beit ïaid ryntih ka jingpyntreikam ïa ka SIR hapoh ka District.
Ha kane ka jingïalang, u la pyntip ba 63,731 tylli ki ‘Enumeration Form’ la sam ha kylleng ki jaka jong ki 15 tylli ki Assembly Constituency, lait noh ka Sohra Sub-Division, kat haduh ka por 5 baje janmiet jong ka 2 tarik Naitung 2026.
Ïa ki ‘Form’ na ka bynta ki Booth Level Agent (BLA) la ïoh ban pdiang tang na ki 2 tylli ki National Party bad kawei ka party na Jylla. Haba batai shai ïa ka jingmut jong kane ka kam, u Deputy Commissioner u la ong ba “Ka jingthmu ba nyngkong eh jong ka SIR kam dei ban pynrung kyrteng ïa ki nongthep Vote ba thymmai, hynrei ban shim jingkheiñ ïa ki nongthep Vote ba la don lypa katkum ka Electoral Roll u 2025 bad ka Legacy Roll jong u snem 2005, kumta ka jingkynnoh ba ka dei ka jingpynrung kyrteng ïa ki nongthep Vote ba thymmai ka dei ka bym shong nongrim.”
