Shillong, Naitung 03:
Ki ar tylli ki phlim khasi kiba la shah jied ban ïaknieh ïa ka khusnam Best Film, Best Actor Male bad Best Director kin sa ïaknieh ïa ki khusnam bad ki phlim na Manipur ha ka Prag Cine Award 2026 kaban long ha Khanapara, Guwahati, Assam ha ka 5 tarik mynta u bnai Naitung 2026.
Kine ki phlim khasi kiba la shah Nomination Best Film North East ki don lai tylli ar tylli na ki phlim khasi bad kawei ka phlim Manipur. Ki phlim khasi ki long kawei ka dei ka phlim Tyngkai ba la pynmih da ka Chwa Syiemlieh Film Production ba la ak da u Phira Dohtdong, Goldenstar Suchiang, Sherilin Khongwar, Rishisha Mynsong kaba la direct da u Bah Section Syiemlieh, kawei ka dei ka phlim Tang Shiteng Por ba la pynmih da u Bah Lansius Syiemlieh ba la direct da u Bah Cores Marwein ba la ak da u Bah Lansius Syiemlieh bad Zarina Marbaniang bad kawei ka dei ka phlim Manipur.
Haba phai pat ha ka Nomination Best Actor North East Male ki don ar ngut ki tyngthop na ki phlim khasi, kata u Phira Dohtdong uba ak kum u tyngshop lamkhmat ha ka phlim Tyngkai, u Bah Lansius Syiemlieh uba ak ha ka phlim Tang shiteng por bad u tyngshop Manipuri u Bijendra Laishram uba ak ha ka phlim Thamoigi Atiya.
Katba ha ka Nomination Best Director North East la shah jied tang uwei u director phlim khasi u dei u
Bah Cores Marwein uba la direct ïa ka phlim Tang shiteng por, katba ar ngut ki director ki phlim Manipuri kata u Bijgupta Laishram uba la direct ïa ka phlim Thamoigi Atiya, u Rakesh Moirangthem uba la direct ïa ka phlim Phouoibee-The Godes of Paddy.
Katba kiwei pat ki khusnam ka Prag Cine Award ka la buh kham bun ïa ki kyrdan bapher-bapher ïa ki phlim Assamese namar kane ka khusnam ka dei ba la pynïaid na Assam.
Ha kane ka Prag Cine Award 2026 kan kham long kyrpang namar kin leh burom ïa u nongrwai ba pawnam ka Assamese u Zubeen Garg uba la khlad mynshem snem ha Singapore.
Hadien ba la dep sam ïa ki khusnam ki nongpynïaid kin pynsngewtynnad ïa kiba wan peitkai bad ïa kiba shah ‘nominate’ da ka jingrwai ki phlim Bollywood ban sa wan rwai da u Shan bad ka Mahalakshmi.
