Shillong, Naitung 03
Ka Ïingbishar ba hakhliehduh ka ri India, ka Supreme Court mynta ka Sngi Thohdieng, ka la kyntait ban pynsangeh ïa ka jamin jong ka Meghalaya High Court, kaba la ai ïa ka Sonam Raghuvanshi, kaba shah kynnoh ba ka la pynïap ïa u kurim jong ka, u Raja Raghuvanshi, ha ka por ba ki wankai ‘Honeymoon’ sha Sohra ha u snem ba la dep.
Ka Meghalaya High Court ha ka 29 tarik Jylliew ka la pynskhem ïa ka hukum jong ka Ïingbishar jong ka nongbah Shillong ha u bnai Ïaïong kaba la ai jamin ïa ka Sonam, kaba la pynlong ïa ka Sorkar Jylla ban tuklar ïa katei ka hukum.
Ka Supreme Court ka la pynpaw ïa ka jingsngewkhia halor ka hukum jong ka Ïingbishar High Court hynrei ka la kyntait ban pynsangeh noh ïa ka, da kaba kdew ba ka Sonam ka la dep ban mih na phatok.
Ka ‘Bench’ jong ki nongbishar u M.M. Sundresh bad u Sheel Nagu ki la ong ba kin peit shuwa ïa ka jingïaid jong ka jingbishar.
Ha katei ka jingbishar, u Solicitor General, u Tushar Mehta, uba mih na ka bynta ka Sorkar Meghalaya, u la kdew ruh ïa ka mukotduma pynïap briew ha Pune Fort, ha kaba uwei u briew uba kyrteng u Ketan Agarwal, u la shah pynïap ha ka briew kaba mut ban ïathoh bad u, ka Siya Goyal da ka jingïarap u baieid jong ka, u Chetan Chaudhary.
U la ong ba ki jingkynnoh pyrshah ïa ka Sonam ki long kiba khia ha ka jinglong, bad ym lah ban pyllait ïa ka halor ki daw ba biang.
