Shillong, Naitung 03
Haba pynpaw ka jingsngew khia halor ka jingpyntreikam ïa ka Special Intensive Revision (SIR) ban pynthikna ïa ka thup kyrteng thep vote (Electoral Roll), ka Khun Hynñiewtrep National Awakening Movement (KHNAM) ka la ong ba kan thoh sha u Chief Electoral Officer (CEO) ban dawa ïa ka jingpynthikna ba ki trai Jylla kim dei ban shah weng ne shah kyntait na ka Electoral Roll.
“Ngi la pule bniah ïa ki kyndon jong ka SIR ruh, bad hooid, ngin pynpaw ïa ka jingsngewkhia lada don ka jingshah weng ne shah kyntait ki trai Jylla ha ka Electoral Roll” la ong u Working President ka KHNAM u Bah Thomas Passah.
U Bah Thomas u la kdew ba ïa ka jingpyntreikam ïa ka SIR la leh katkum ka thup kyrteng thep vote jong u snem 2005. “Ha kaba kut ïa ka SIR la pynshong nongrim katkum ka thup kyrteng thep vote 2005. Ki shim ïa ki jingtip na ka jinglum jingtip kaba khatduh kaba la pynlong ha u snem 2005” la ong u Bah Thomas.
“Mynta, bun ki briew kiba dei ki nongshong shnong trai Jylla, khamtam ki riewlum trai ri trai muluk, kan long kaba bakla lada ki trai ri trai muluk ki shah weng ne shah kyntait na ka thup kyrteng thep vote hadien ba la pyndep ïa ka SIR” u la bynrap.
U Bah Thomas u la pynpaw ka jingsngewkhia halor ki khubor ba la aiti ïa ki phorm lum jingkheiñ briew (Enumeration Forms) ha ki nongmihkhmat na ki sengsaiñ pyrthei.
“Ngi la ïohi ïa ki khubor ba ïa ka phorm lum jingkheiñ briew (Enumeration Forms) la ai sha u nongmihkhmat na ki sengsaiñ pyrthei, kaba mut ba u nongmihkhmat ne ka seng saiñ pyrthei, ki lah ban pyndonkam ïa ka na ka bynta ka jingmyntoi saiñ pyrthei jong ki” u la ong.
Haba ïadei bad ka 18-West Shillong Konstitwensi, u la ong ba ka Konstitwensi ka pyni ïa ka jingkylla ha ka jingbun briew.
“Ka 18-West Shillong Konstitwensi, kadei ka thaiñ ha kaba ki riewlum trai ri trai muluk kidei ki nongthep vote rit paid, bad kumno ki la kylla rit paid, ka long kaba phylla haduh katta-katta” u la ong.
“Lada phai biang sha ki snem mynshwa, ki riewlum ki dei ki nongshong shnong kiba bun paid ha katei ka jaka, hynrei suki suki, ki riewlum ki la kylla long ki rit paid ha ka thup kyrteng thep vote” u la ong.
“Kumta ngi sheptieng ba lehse ki riewlum trai ri trai muluk kin shah weng ne shah kyntait ha ka SIR, bad lada jia kumta, kan long ka jingshah pynjot ïa ka rukom synshar ne ka saiñ pyrthei ha ka Jylla Meghalaya” u la bynrap.
U Nongïalam ka KHNAM u la dawa ruh ban leh eiei ïa ki nongthep vote kiba don bun tylli ki Voter ID. “Ha kaba ïadei bad ki nongthep Vote ki bym dei ki riewlum trai ri trai muluk, la pynshisha bad la tip, ba bun na kine ki nongthep vote ki bym dei na kane ka Jylla ki don sa kiwei pat ki EPIC na la ka Jylla ba ki wan” ong u Bah Thomas.
“Ki leit thep vote ha la ki Jylla ba ki dei trai shnong bad ynda la wan ka ilekshon ha Meghalaya, ki thep vote ruh hangne, kaba mut ba ki don 2 tylli ki EPIC, bad ka jingdon 2 tylli ki EPIC ka long be-aiñ katkum ka Election Commission of India,” u la ong.
“Ngi kyrpad ïa ka tnad ilekshon, haba pyntrei ïa ka SIR, ba kin pynthikna ba baroh kine ki briew kiba la don lypa ïa ki EPIC na la ki Jylla ba ki wan, yn pyndam noh ïa ka kyrteng jong ki na ka SIR”, u la ong.
U Bah Thomas u la kyrpad ïa ki nongshong shnong ban pynshisha ïa ka jingpynrung jong ki ha ki thup kyrteng thep vote.
“Ngi kyrpad ïa baroh ki nongshong shnong khamtam ïa ki trai ri trai muluk jong ka Jylla ba kin sngewbha ban shim khia ïa kane bad sngewbha ban pynthikna ba ka kyrteng jong phi kan rung ha ka SIR namar lada ym don kan wanrah jingeh ïa ki pateng ban wan lada pynlong biang ïa ka SIR ha kane ka Jylla Meghalaya,” u la ong.
“Kumta, ngin sa phah da ka jingthoh sha u CEO ban pynthikna ba la leh ïa ka jingpynshisha kaba biang,” u la ong bad bynrap, “Ngin sa buddien bha ïa kane ka rukom treikam jong ka SIR, bad lada don kano-kano ka jingjia ngin sa thoh sha ka tnat ilekshon ha ka Jylla Meghalaya.”
