Shillong, Naitung 03
U Bah Chandame Sungoh, Chairman ka Hynñiewtrep Border Dispute Redressal Forum (HBDRF) ha ka 03 tarik u Naitung 2026, u la kyntu ïa ka Regional Committee, West Jaiñtia Hills District, ba kam dei ban shong tang na Jowai ban pynbeit pud bad ka Regional Committee na West Karbi Anglong District ka Jylla Assam.
Haba kren sha ki lad pathai khubor hadien ka jingwan buh jingthoh ha ophis u Myntri Rangbah ka Jylla, u Conrad K Sangma bad kumjuh ha ophis treikam u Bah Sñiawbhalang Dhar, Symbud Myntri Rangbah, halor ka ka kam pynbeit pud ïa hynriew tylli ki jaka ba don jingïakynad ha ka Phase II, u Bah Chandame u la ong ba kiba don ha ki Regional Committee kidei ban hiar ha man ki shnong, ban sngap ïa ka sur ki nongshong shnong, kumba paw ha ka Term of Reference jong ki Committee.
“Kane ka jingleit buh jingthoh, ka long tang katto-katne sngi hadien ba ka Sorkar Meghalaya ka la pyllait ïa ka thup ki ban don ha ki Committee, ha kaba ka Regional Committee jong ka West Jaiñtia Hills, yn khlieh da u Bah Sñiawbhalang Dhar, MLA ka Nartiang, u Symbud Myntri Rangbah ka Jylla,” u la ong.
U la ong ba kum ka Forum ka pynpaw ka jingsngewkmen ba ka Sorkar ka la thaw ïa kane ka komiti, kaba don ka jingthmu bad jingangnud na bynta ban pynbeit noh ïa u pud u sam ha khappud kine ki 2 Jylla, kaba la neh mynta la da ki phew phew snem.
“Ngam kynnoh hynrei kane ka Sorkar MDA-1 ba la dep, kam shym la pat leit sha ka jaka kaba dei ka block-1 bad la shu kut tang ha ka jingïakren ha Jowai ha conference hall. Ngi la dep ban mad ha kane ka MDA-1 bad mynta ngi dawa ba kane ka MDA-2 ba mynta ba kan leit sha kito ki jaka bad ban jurip man kawei pa kawei ka Shnong bad ban ïakren markhmat ruh bad ki nongshong shnong, ban lum ban lang ïa ki jingtip nadong shadong,” la ong u Bah Chandame.
“Ngi dawa beit na ka Sorkar ba kadei ban bud katkum ki aiñ bad ki kyndon kaba la kdew ha ka jingpyntip (notification). Ngi kloi ruh ban ai ka kti kamon ka kti kadiang ban ïatreilang bad ka Sorkar, khnang ba ka kam pynbeit pud kan long kaba jop bad kan ïaid beit ïaid ryntih,” u la bynrap.
Namarkata, u Bah Chandame u la pynthikna ba “ki jaka ki puta kiba dei jong ngi, kin wan phai biang ha ka Jylla jong ngi, kumba ju long naduh hyndai hynthai na bynta ka bit ka biang bad ka shongsuk shongshngaiñ ki nongshong shnong.
Haba kylli, u Bah Chandame u ong “Hooid ki ong ba ynda la dep ka ilekshon ha Assam yn sa pynbeit noh ïa u pud u sam, hynrei na ka liang jong ka forum hi ngi ong ba kane kamdei tang ka mat ilekshon namar naduh ka MDA-1 la dep leh ïa kane. Ka jingkyrmen ka long ba ka regional komiti kan bud beit thik katkum ki kyndon ba la buh da ka Sorkar bad jin lada ki dkhot ka regional komiti kin bud beit thik, kan ai jingkyrmen ïa ngi ki paidbah nongshong shnong”.
