Jowai, Lber 09
Ka District Hub for Empowerment of Women, ka tnat Social Welfare, West Jaiñtia Hills District ryngkat ka jingïatreilang ka tnat Pulit ka Jowai ha ka 8 tarik Lber ki la pynlong ka jingïaid paidbah (rally) da ki arshaka ban ïalap ïa ka jingkordor jong ka jingpynkupbor, jingïatylli, jingkhlaiñ bad ka jingkiew shaphrang.
Ïa kane ka jingïaid paidbah la kaweh lama da ka Kong C Lyngdoh, Additional Superintendent of Police, Jowai na phyllaw ka District Library Mynthong, Jowai bad pynkut ha madan Wahriong, Mihmyntdu. La shim bynta 70 ngut ki nongñiah arshaka kynthei bad shynrang kiba la ïaid lyngba ka sor Jowai da kaba pynsawa ïa ki sur jingrwai Khasi “Kynthei Tur Shaphrang”.
Shwa ka jingkaweh lama, ka Kong C Lyngdoh ka la pynpaw ba ka International Women’s Day ka dei ka sngi ban rakhe ïa ka jingkhlaiñ, ka jinglah ban ïakhun bad ki jingjop jong ki kynthei ha kylleng ka pyrthei. Ka la ban jur ba wat la ithuh ïa ka jinglah jong ki kynthei, hynrei ka long kaba kongsan kumjuh ban ithuh ïa ki jingeh jong ki ha ki bynta bapher bapher jong ka jingim.
Haba kren shaphang ka jingpynkupbor ïa ki kynthei, ka la ban jur ba ka hok jong ki kynthei ka dei ka hok longbriew manbriew, namar ki kynthei ki don ka bynta kaba kongsan ym tang hapoh ka longïing-longsem jong ki kum ki kmie, ki tnga, ki khun hynrei ki long u budlum jong ka jingkiew ha ka imlang sahlang.
Ka la kdew ba ka jingdon jong kiba bun ki nongñiah arshaka kynthei ha ka rally hi ka long ka jingpynshisha ïa ka jingkiew shaphrang jong ki kynthei. Kala pynshlur ïa baroh ban pynkupbor ïa ki kynthei, ban kyrshan ïa ki ban kiew khnang ba kin lah ban ïalam ïa ki kam ha kiba bun ki bynta.
La ïoh ruh ka jingkren na ka Kong S Lakiang BBBP Ambassador, District Hub, Ma S Manner OC Police Station Jowai, Kong R Ryngkhlem, President Iasnohktilang VO Mihmyntdu kiba la ban jur halor ka jingdonkam ban pynkupbor ïa ki kynthei bad la pynshlur ïa ki ban ïakhun ïa kino-kino ki jingkhanglad ïa ki ban kiew shaphrang ha manla ki bynta.
Ka Kong I Kharpran, OC Women Police Station Jowai, ka Kong L Ksoo Centre Manager cum Protection Officer One Stop Centre, u F Rynnga, District Mission Coordinator, District Hub for Empowerment of Women, Jowai, ka Kong Y Najiar, District Social Welfare Officer, Jowai bad Kong Yoohi Kyndait, Gender Specialist, District Hub for empowerment of Women, Jowai kila shim bynta lang ha ka Rally ban ai ka khubor jong ka jingkordor ka jingpynkupbor bad ban ai kajuh ka jingïaryngkat ïa ki kynthei.
