Mawkyrwat, Lber 09
Ki paid ‘riewngeit Khristan jong ka Balang Pres-byterian na ki Presbytery bapher bapher jong ka Synod Sepngi ha ka Sngi U Blei jong ka taïew ki la tuid da ki lak sha ka jingïaseng paidbah jong ka Khasi Jaiñtia Presby-terian Synod Sepngi kaba 23 kaba la long ha ka Balang Sakwang, South West Khasi Hills District.
Ïa kane ka jingïaseng paidbah kaba ka phang pdeng ka dei ka “Ka jingshah shitom ka Balang bad ka Burom ka Ban Sa Paw” la sdang naduh ka 6 tarik haduh ka 9 tarik u Lber 2025.
Ha ka jingïaseng paidbah jong ka 9 tarik ha ka por 10:30 mynstep, u Rev. RR Rapsang u la ïoh ban sam ïa ka khubor na ka ktien ka jong U Blei ha kaba u la kren shaphang ka jingleh pop ki jaidbynriew Isreal bad ka jingmane Blei thaw haduh ba ki la klet noh ïa la u jong U Blei, hynrei U Blei u dang map ïa ki pop jong ki namar ka don ka jingïateh jutang bad U Blei. U la pynïasyriem ïa ka jinglong jingim ha kine ki sngi ba mynta ïa ka jinghiar jong ka jinglong mynsiem jong ki Khristan hynrei U Blei u dang ieid bad dang map lada ki kylla kaba mut namar ka don ka jingïateh jutang bad U Blei ïa kaba u la pynshong nongrim na ka Kitab jong u ‘Hosia’ Lynnong kaba 6 bad ka dkhot kaba nyngkong kaba ong “Ale, ïa Ngin ïa Phai Sha U Trai Namar U La Tar ,Te Un Pynkhiah Iangi, U La Shoh Bad Un Sop Spain Iangi.”
Katba ha ka jingïaseng kaba ar ha ka por 1:30, u Rev. CL Laloo uba dei ruh u Moderator jong ka KJP Synod Mihngi u la ïoh ban sam ïa ka khubor na ka ktien jong U Blei ïa kaba u la pynshong nongrim na ka Kitab Salm Lynnong kaba 20, dkhot kaba 5 kaba ong “Ngin Leh Risa Ha Ka Jingpynim Jongme Bad Ha Ka Kyrteng U Blei Jongngi Ngin Sieh ïa la ki lama, To U Trai Un Pyndep ïa Ka Jingkyrpad Jongme Baroh”.
U Rev. CL Laloo u la kren shaphang ki lai tylli ki lama kiba kum ki khun Khristan ki dei ban rah ha kine ki sngi kiba mynta, ka lama jong ka jingjop ha ki jingïaleh ym da ka thma hynrei da ka bor bad ka snam jong u Jisu Khrist. Ka lama jong ka jingpynithuh ïalade sha ka pyrthei da ka jingieid ka jingkhuid bad ka jingsngewrit bad ka lama jong ka jinglaitluid kaba yn nym shah teh mraw ha ka pop.
Ha ka jingïaseng kaba nyngkong la ïoh sngew ruh ïa ki sur jingrwai kiba thiang na ka Jingïaseng Khynnah Balang Sakwang, Standing Choir BSI Shillong Auxiliary, Standing Choir Mairang Presbytery bad ka Standing Choir Mawlai Presbytery bad ha ka jingïaseng ba ar na ka Balang Presbyterian New Nongstoiñ, Balang Presbyterian Sakwang, Standing Choir Mawkyrwat Presbytery bad ka Standing Choir KJP Synod Sepngi.
