Shillong, Lber 09
U Chairman ka Khasi Hills Autonomous District Council (KHADC) bad uba dei ruh u MDC ka Voice of the People Party (VPP) na Mawkhar Pynthorumkhrah Konsti-twensi, Bah Strong Pillar Kharjana, u la ong ba ha ka por ba u don bynta ha ka Executive Committee jong ka Dorbar Shnong Lumdiengjri, ki la rai ban ym ai NOC shuh ïa ki bar jylla hynrei ban plie lad ne pynshlur ïa ki samla ka shnong ba kin mih shakhmat ban leh ïa ka khaïi-pateng.
Haba ai jingkren ha ka prokram pynkup bu-rom ba la pynlong da ka Dorbar Shnong Lumdiengjri kaba la long ha ka 8 tarik u Lber, 2025, u Bah Strong u la ong ba ka khaïi-ka pateng u Khasi ka la don lypa hapoh ka Bri u Hynñiewtrep hynrei ka jingkylla kynsan ka khaïi-ka pateng u Khasi ka dei naduh ba la wan rung kyrthep da kiwei pat ki briew nabar. Kumta na ka liang ka EC bathymmai ka Council hapoh ka jingïalam ka VPP kan peit pyrkhing bha ïa ka jingai laisen khaïi sha ki bar jylla bad kan pynshlur pat ïa ki samla Khasi ba kin mih shakhmat ban pyndap ïa ki jaka ba suda.
“Hynrei nga kyntu ïa ki paradoh-parasnam ba phin shim kabu halor kata ka bynta ban pyndap ïa kata ka jaka ba suda namar kumba ngi tip ka khaïi-ka pateng ka dei u budlum jong kano-kano ka Jaidbynriew, hynrei lada ïa uta u budlum la ïoh ban knieh noh da ki briew kiba nabar, ka long kaba eh ïa ka Jaidbynriew ban kiew sha kita ki lynti kiba kham shajrong”, ong u Bah Strong.
Katba u MDC ka Jaïaw-Mawprem konstitwensi, Bah Denzil Raynard Chen, u la ong ba wat lada ki la mih shibun ki jingeh bad ki diengpyngkiang ha ka por ba ka seng ka la pynbna ïa ka tiket jong ki MDC hynrei u la ïoh pat ïa ka jingjop lyngba ka jingkyrshan bad ka jingshaniah jong ki paidbah jong kane ka konstitwensi.
U Bah Denzil u la pynpaw ka jingai khublei kyrpang ïa ka Dorbar Shnong Lumdiengjri, ki nongshong-shnong lem bad ka konstitwensi hi baroh kawei kiba la ai ka jingkyrshan ba radbah ban pynjop donburom ïa u ha ka MDC kaba dang shu dep shen.
“Wat lada ha ka por ba la pynbna ïa ka tiket, ki la mih shibun ki diengpyngkiang, ki jingkynnoh bad ki jingshah kynthoh hynrei nga la ïoh ïa ka jingjop lyngba ka jingkyrshan bad ka jingshaniah jong ki paidbah jong kane ka konstitwensi”, ong u Bah Denzil.
