Jowai, Lber 09
Ka District Social Welfare Officer (DSWO) ryngkat ka jingïatreilang bad ka District Sankalp Hub for Empowerment of Women (DHEW), West Jaiñtia Hills District, Jowai ka la rakhe ïa ka sngi kyrpang jong ki kynthei halor ka phang “For All Women and Girls: Rights, Equality, Empowerment.”
Ïa ka jingïalang, la pynlong hapoh District Library Auditorium, Mynthong, Jowai ha ka 7 tarik Lber. Kane ka jingïalang ka la rakhe ruh ïa ka jingdap 10 snem ka Beti Bachao Beti Padhao (BBBP) kaba thmu ban kyntiew bad pynkupbor ïa ki khynnah kynthei lyngba ka jingnang-jingstad kaba ïa ryngkat hapdeng ki shynrang bad kynthei.
Ka Kong D.V. Lyngdoh, MCS, u Additional Superintendent of Police, u Ishaan Gupta, IPS, u Resource Person, ka Kong I. Warjri, Assistant Director ka Good Governance Cell ka Meghalaya Administrative Training Institute, Shillong, ka Kong Y. Najiar, District Social Welfare-cum-District Nodal Officer ka DHEW, Jowai ruh ki la donlang ha kane ka sngi.
Haba ai jingkren sha ki paidbah, ka Kong D.V. Lyngdoh ka la ban jur ba ka jingnang-jingstad ka long kaba donkam ban pynkupbor ïa ki kynthei namar ka dei ka atiar kaba khlaiñ tam, ban ïada na kino-kino ki jingeh bad jingshah ban beiñ ne leh beiñ. Hynrei ka la pynkynmaw ruh ba ka jingnang-jingstad ba pura kam mut tang ban ïoh ki kyrdan pule bapher-bapher, hynrei ban kiew ruh ha ka akor ka burom bad ka longbriew ka manbriew.
Ka la ban khia ruh ïa ki kmie ki kpa ban ym ailad ïa ki khun jong ki la ki dei ki kynthei ne shynrang ban pep skul shiteng por namar kane kan ktah ïa ka lawei jong ki.
U Additional Superintendent of Police, u Ishaan Gupta ha ka jingkren u la pynpaw ba la kha ïa u ha ka Jylla kaba ka jingsynshar ka ïapher na ka Jylla Meghalaya.
U la ïaroh ïa ka jingkhlaiñ bad jingkut jingmut jong ki kynthei hangne, da kaba kubur ïa ka jingnoh synñiang jong ki ha ki kam bapher-bapher, la ka long ha ki kam Sorkar ne ha ka saiñ pyrthei.
U la ïaroh ruh ïa ka jingïashim bynta shitrhem jong ki nongshong shnong ha ka roi ka par ha ka imlang-sahlang, da kaba pynpaw ba kum kane ka jingïatylli ñiar bna ïohi shawei pat ki jaka jong ka ri.
Nalorkata, u la kyntu ruh ïa baroh ban ai ka jingïatreilang bad kyrshan iwei-iwei ha kano-kano ka jaka kaba ka jingeh ka lah ban don bad ban wan shakhmat lada don kano-kano ka jingeh kaba jia ha ka ki shnong ki thaw ne ki para marjan.
Katba ka ‘riew shemphang, ka Kong I. Warjri ka la ai jingshai halor ki mat ba kongsan kiba ïadei bad ka jingshngaiñ jong ki kynthei, ka jingïada katkum ka aiñ bad ki skhim jingïarap jong ka Sorkar. Ka la ban jur ïa ka jingdonkam jong ka One Stop Centre (OSC) kaba long kum ka jaka ai jingkyrshan mardor ïa ki kynthei kiba ïakynduh ïa ka jingshah thombor.
Ka OSC ka ai ïa ki jingshakri kiba donkam kynthup ïa ka jingïarap ha ka liang ka koit ka khiah, ka jingïarap ha ka liang ka aiñ. Ka Kong Warjri ka la batai ruh halor ki skhim Sorkar bapher-bapher, kiba na ka liang ka Sorkar Pdeng bad Sorkar Jylla ki thmu ban pynkup bor ïa ki kynthei.
Kum shi bynta jong kane ka jingrakhe, la pynlong ruh ïa ka ‘Signature Campaign’ kaba la ïashim bynta da u Additional Superintendent of Police, Ishaan Gupta, IPS, ka Additional Deputy Commissioner, ka Kong D.V. Lyngdoh, MCS, ki heh Sorkar, ki samla pule, ki ophisar bad ki nongtrei jong ka District Social Welfare.
Nalorkata, la shim ruh ïa ka jingkular kaba kular na ka bynta ka hok jong ki kynthei ba la ïalam da ka Kong L. Ksoo, Centre Manager-cum-Protection Officer One stop Centre.
