Shillong, Lber 09
Ki pulit ka thanat Mairang ki la rah ïa u briew uba ka shnong Langtor ka la jer kyrteng kum u Bah tang ban tohkit halor ka jingjia ba khlad ka longkmie ka Kong Darisha Lyngdoh bad u khun jong ka uba dang ar bnai.
Katkum ki khubor ba la ïoh lum la ïathuh ba ki pulit ki la rah ïa une u Bah ha ka 4 tarik mynta u bnai.
Na ka liang ka Executive Committee jong ka Dorbar Shnong Langtor kaba hap ha Eastern West Khasi Hills District hadien ba ka la ïoh ïa ka jingbatai ha ka jingthoh na ki bahaïing bahasem jong ka Kong Darisha Lyngdoh Kynshi kaba 26 snem ka rta, halor ka jinglap ïa ka metïap jong ka bad ïa i khun ba ka dang bah ha ka met na kawei ka pung pynlang um ba jyndong kaba don ha shnong Langtor myn ha ka 2 tarik Lber 2025, ka la ïoh ban pynshai ruh ïa kaei kaba la jia ha shuwa ban lap ïa ka metïap jong ka Kong Darisha Lyngdoh bad i khun.
Katkum ka kyrwoh ba la phah da u Sordar Shnong Langtor, Bah RSL Kynshi bad Bah Teilor Kharsyntiew Secretary Shnong, ka Executive Committee jong ka shnong Langtor ka la batai ba naduh ba sdang kiba pynpoi shaduh ka jingsuba shah pynïap dusmon jong ka Darisha Lyngdoh Kynshi, 26 snem ka rta bad u khun ba dang ar bnai ba dang bah ha ka met jong ka ha kaba ïa ki metïap la lap na kawei ka jaka pynlang tan umdih kaba jyndong kaba don ha Langtor, Eastern West Khasi Hills ha ka 2 tarik Lber 2025.
Ha u Nailar 2024, ki bahaïing ka Kong Darisha ki la tip ba ka Darisha Lyngdoh ka la armet. Ka Kong Darisha ka ïathuh ha ki bahaïing ba u kpa jong une u khyllung ba dang pun u dei uwei u briew ba la shu khot hangne kum u Bah.
Ha une u juh bnai ki bahaïing ka Darisha ki la pyntip sha une u Bah ba ka Kong Darisha ka la armet na u. Une u Bah u la wan sha ïing ka Kong Darisha bad ong ba um dei u kpa jong une u khyllung ba dang pun ka Kong Darisha. Une u Bah u la byrngem-byrsit ruh ïa ka Kong Darisha bad ïa ki bahaïing ba kim dei ban ïathuh ïano-ïano ba une u Bah u dei u kpa jong ine i khyllung ba dang pun lym kumta kin mad ïa ki jingeh.
Ha ka 3 tarik u Kyllalyngkot 2025, ka Kong Darisha ka la kha ïa u khyllung shynrang ha Tirot Sing Memorial Civil Hospital, Mairang.
Ha ka 15 tarik Kyllalyngkot 2025, une u Bah u la wan biang sha ïing ka Kong Darisha ban byrngem-byrsit bad pyntieng ïa ka (Kong Darisha) bad ki bahaïing jong ka. Nangta, u la dawa ba dei ban weng bad pyndam ïa ka kyrteng jong u na baroh ki kot ki sla ba ïoh na hospital kiba thoh ïa ka kyrteng jong u kum u kpa jong u khun ba ka Kong Darisha ba dang shu kha.
Ha ka 18 tarik u Kyllalyngkot 2025 la wan kawei ka briew ba la phah da utei u Bah bad ki bahaïing jong u ban wan pyntieng bad byrngem-byrsit biang ïa ka Kong Darisha bad ki bahaïing ba kin sa mad ïa bun ki jingeh lada kim leh kumba la dawa une u Bah ïa ki.
Ha ka taïew ba nyngkong u Rymphang 2025, Ka Kong Darisha ka la ïoh ïa ka ‘Pleader’s Notice’ kaba bthah ïa ka ban weng ïa ka kyrteng jong une u Bah na ki kot ki sla ba thoh ïa ka kyrteng jong u kum u kpa jong u khun ka Kong Darisha lane ban hap leh ïa ka DNA Test ban pynshisha ïa ka jinglongkpa une u Bah ïa u khun ka Kong Darisha.
Ha ka 10 tarik u Rymphang 2025, ki bahaïing ka Kong Darisha ki la leit ïakynduh ïa u Medical Superintendent jong ka Tirot Sing Memorial Civil Hospital, Mairang bad kyrpad ba un ïarap ban pynleh ïa ka DNA Test. U Medical Superintendent u la ïathuh ïa ki bahaïing ka Kong Darisha ba ym lah ban leh ïa ka DNA Test khlem kano-kano ka Court Order.
Ha ka 12 tarik u Rymphang 2025, ki bahaïing ka Kong Darisha ki la ai da ka ejahar ha thanat Mairang ban ïada ïa ka Kong Darisha na ki jingbyrngem jingbyrsit jong une u Bah ïa ka Kong Darisha bad ban ïarap ruh ban pynleh ïa ka DNA test ban pynshisha ïa ka jinglongkpa jong une u Bah ïa u khun ka Kong Darisha.
Ha ka 24 tarik u Rymphang 2025, la pynlong ïa ka jingpynsngap (hearing) ba nyngkong ba la khot da u Judicial Magistrate, Eastern West Khasi Hills.
Ha ka 28 tarik u Rymphang 2025, ka la don biang ka jingpynsngap (hearing) ba ar ba la khot da u Judicial Magistrate, EWKH hynrei la pynkynriah noh.
Ha ka 1 tarik u Lber 2025, la shem da ki bahaïing ba ka Kong Darisha ka la jah na ïing ryngkat bad u khun ha ka por 5:30 janmiet.
Ha kajuh ka sngi la ujor ejahar ha thanat Mairang halor ka jingjah kynsan jong ka Kong Darisha na ïing.
Ha ka 2 tarik u Lber 2025, la lap pynban ba ka Kong Darisha ka la ïap ryngkat bad u khun ba ka dang bah ha ka met ha ka por 9 baje mynstep.
Ha kane hi kajuh ka sngi la ujor ejahar ha thanat Mairang halor ka jingsuba shah pynïap ka Kong Darisha bad u khun ba dang ar bnai.
Kumta ka Executive Committee jong ka Dorbar Shnong Langtor ka kwah pyntip hangne khnang ba kan ym mih kano-kano ka jingsngewthuh bakla ïa kine ki jingjia baroh hapoh shnong bad shabar shnong bad ban ap ïa ka jingbishar ba hok jong ka ïingbishar.
