Shillong, Lber 10
U Myntri Rangbah ka Jylla, Conrad K Sangma ha ka Lah Sngi U Blei u la pyntip ba ïa ka jingdon jong ki longkmie kiba khlad noh ha ka por armet bad ki khyllung kiba hapoh san snem hapoh ka jylla, la lah ban pynhiar da 40 persen.
U Conrad u la ong ka jinglah ban pynhiar ïa ka Maternity Mortality Rate (MMR) ka la kham duna ha u snem 2023-2024 bad 2024-2025 namar ka la hiar da 40 persen ban nujor bad u snem 2018.
Ïa kane u la pyntip haba jubab halor ka jingkylli kaba la wanrah da u MLA ka VPP na North Shillong u Bah Adelbert Nongrum halor ka jingai shuti ïa ki longkmie kiba punkhun ha ki kynta kylli jingkylli hapoh ka dorbar mang tyngka kaba dang ïaid shakhmat.
U Myntri Rangbah u la pyntip ruh ba ka MMR ka dei kawei na ki mat kaba la shimkhia bha hadien ba la thaw ïa ka Sorkar MDA-I naduh u snem 2018.
U Conrad u la pyntip ba ha katei ka por ka MMR ka la long arshah ïa ka jinglong-jingman hapoh ka ri ha ki hynriew snem kiba la leit. Da ka jingshimkhia ha ki kyrdan bapher-bapher, la lah ban pynhiar noh ïa ka jingkhlad jong ki longkmie kiba punkhun da 40%.
U Myntri Rangbah u la pyntip ba na ka bynta ki nongtrei kam Sorkar kiba pura, la khmih ïa ki katkum ka Subsidiary Rule 111 jong ka Meghalaya Fundamental Rules & Subsidiary Rules, 1984 (kumba la pynkylla).
Ki longkmie kiba punkhun ki la ïoh ïa ka shuti kaba 120 sngi kiba don ym duna ïa ar ngut ki khun. Hynrei lada jia ba i khunlung i khlad noh hapoh kpoh ne kaba la tip kum ka Stillborn Delivery, lah ban ai shuti shuh shuh ban ïa katei kaba la kdew haneng. U Conrad u la ong ba ka jingïapher ka jingïoh shuti na ka bynta ki longkmie kiba trei ha ka kam Sorkar bad ki longkmie kiba trei ha ki kam shimet bad kiba trei contract ka dei namar ba hap ïaid lyngba ka aiñ kata na ka bynta kiba trei kam Sorkar hap ïaid lyngba ka Meghalaya Fundamental Rule and Subsidiary Rule 1984 katba ïa ki nongtrei ha ki kam shimet la pyntreikam lyngba ka Central Maternity Benefit Act 1961 ba kynthup ïa ka Maternity Benefit Amendment Act 2017.
Kumba long la ai shuti shwa 90 sngi kaba la treikam naduh ka 14 tarik u Rymphang 1984 haduh ka 22 tarik u Nohprah 2009. Hadien la kyntiew noh na ka 90 sngi sha ka 120 sngi naduh ka 23 tarik u Nohprah 2009 haduh ka 7 tarik u Nohprah 2017. Hadien kane la kyntiew noh na ka 120 sngi sha ka 180 sngi naduh ka 8 tarik u Nohprah 2017, la ong u Conrad.
Lah ban kdew ba baroh ki karkhana jong ki riewshimet ne kiba pynïaid da ka Sorkar ki hap ha katei ka Maternity Benefit Act.
