Shillong, Lber 10
Na ka bynta ban pynwandur thymmai ïa ka bynta jong ka Barik ne ka Barik Redevelopment Project, na ka liang jong ka Sorkar Jylla ka la pyntip ba ka la dep ban thung da ka kompeni na Bangalore, ka Jana Urban Space, ba kan pyntrei ïa katei ka projek.
Ïa kane la pyntip da u Symbud Myntri Rangbah ka Jylla u Bah Sniawbhalang Dhar uba khmih ruh ïa ka tnat Pynroi Sor hapoh ka ïingdorbar bad la ong ba ïa ka tender la dep khot na ka bynta ka National Design Competition.
U la pyntip ba ka jingshna ïa ka Barik Complex, kaba long ruh ka jaka ba la rim bha ka don ha ka jaka kaba khapngiah bad ka donkam da ki shlem treikam kiba tbit ha kane ka kam.
Ban pynthikna ba kane ka projek kan long kaba seisoh, u Bah Sniawbhalang u la ong ba ka tnat ka la pynlong ruh ïa ka jingbishar kaba bniah ïa ki tender. “Lyngba kane la thmu ban jied tang ïa ki kynhun kiba pynpaw ïa ka jingtbit ha kaba pynwandur ïa kijuh ki jaka kiba la rim, da kaba tyrwa ïa ka jinglah ha ka kam bad ka jingïakob ha ka dor ka mur,” u la ong bad bynrap, “Ïa ka kynhun ba la jied la pynshong nongrim katkum ka jinglah ban shna ïa ka projek ha ka dor kaba biang da kaba bat ruh ïa ka Highest Technical Standards.”
Shuh shuh, u Symbud Myntri Rangbah u la ong ba ïa ka jingpynwandur la ïasyllok bad baroh ki kynhun ïa kaba la ai jingmynjur da ka committee jong ka tnat treikam. U la pyntip ruh ba ka dor jong ka Design Consultancy ka long T.25,00,000 lak.
