Shillong, Lber 10
U Dr. Celestine Lyngdoh uba dei u MLA ka Umsning konstitwensi, u la ong ba kaei-kaei ba ka Sorkar ka ai, la ka long ki surok, ki ïing ophis ne C&RD Block ki don beit ki jingkren ha sor ne nongkyndong kiba kynnoh ba kaba ai baroh ki dei na ka pisa ba shu shim ram.
Haba pynksan ïa ka Sorkar ha ka por ba shim bynta ban kren halor ka Mang Tyngka hapoh ka ïingdorbar thaw aiñ ha ka Lah Sngi U Blei, u Dr. Celestine u la ong ba u la pule ha ka “Business Today” kaba pynmih ha ka 27 tarik Rymphang, ka la thoh ba katkum ka kaiphot jong ka RBI, ki Jylla ba bun ram tam, ka Tamil Nadu ka dei kaba hakhmat eh, Uttar Pradesh ba ar, Maharashtra, West Bengal, Karnataka, Andhra Pradesh, Gujarat, Kerala, Rajasthan bad Madhya Pradesh ki dei shiphew tylli Jylla ba bun ram tam.
“Kine ki dei ki Jylla ba don ha ka thup jong shiphew tylli ki Jylla ba bun duh tam ka ram. Hynrei, kaba sngew lyngngoh haba nga peit kiei ki Jylla kiba kiew bha ka GSDP ne kiba kiew ha ki kam pynroi, nga ïohi kine kijuh ki Jylla ha ka thup. Kaei kaba ngi ïoh na kane, ki Jylla kiba nud ban shim ram shibun ki dei ki Jylla kiba treikam bha”, u la ong.
U Dr. Celestine u ong ïa u Myntri Rangbah ba u dei ban long shlur lada ka Sorkar ka kwah ban pynkiew ïa ka Jylla sha kliar ha ki kam pynroi ki dei ban nud ban shim ram.
“Lada u Myntri Rangbah bad ka Kynhun Myntri ki kwah ban pynpoi ïa ka Jylla sha kliar bad sha ka burom, ki dei ban nud ban shim ram, da kaba pyrkhat bha wat la ka lah ban pynmih jingeh”, u la ong shuh-shuh.
Ha kaba ïadei bad ka jingai kyrteng CM ïa ki skhim, u MLA ka NPP u la ong ba hapoh ïingdorbar la pynlong mat tang na ka daw ba jer kyrteng ïa ki skhim ha ka kyntien ‘Chief Minister’ kum ka CM Elevate, CM Assure, CM Focus bad kiwei, ha kaba uwei u dkhot u la ong ba kane ka dei tang ka jingpynkiew skong ïa u Myntri Rangbah.
U la ong ba CM kam mut ka kyrteng u briew ba ai skhim, namar ka jingjer kyrteng ïa ki skhim ka shong ha ka bor ba laitluid jong ka Kynhun Myntri, bad CM ka dei ka kyrteng kaba la ainam ha ka ophis bad uno-uno uba shong u ïoh ïa kata ka nam, namar ym dei ba jer kyrteng ha uta uba long Myntri Rangbah hynrei ïa ka ophis ba u bat.
U MLA ka Liang Pyrshah jong ka Voice of the People Party (VPP) na Nongkrem, Bah Ardent Miller Basaïawmoit ha ka Sngi Thohdieng ba la dep u la kynthoh tyngeh ïa ki skhim ba la pynbna da ka Sorkar, ha kaba u la kynnoh ba ka Mang Tyngka ba la kren da u Myntri Rangbah, Conrad K Sangma ka long tang ban pynkiew skong ïa u, namar ïa ki ba bun ki skhim la buh hakhmat da ka kyntien Chief Minister (CM). U la kynnoh ruh ba ki ‘consultant’ kiba thung da ka Sorkar ban leh ïa ki kam bad ki projek, ki bun kam bad lapmiet ban ïalehkai PUBG.
Halor ka jingkynnoh ïa ki ‘consultant’, na ka liang u MLA ka Liang Synshar, u la pynksan ïa ka Sorkar, ha kaba u la ong ba lada ym don ki ‘consultant’ ki nongbei pisa kin ym don.
U la ong da kaba ai nuksa, ba ki lah ban phah leh ïa ki kam ha kiba trei kham hapoh bad katba ki dang ap bad peit, ki lah ban kynud ne rwai lane ki lah ban lehkai, bad lada ki kwah bad sngewtynnat ban ïalehkai PUBG ki lah ban leh.
U Dr. Celestine u la ong ba ka mat ba kynnoh ïa ki ‘consultant’ ba ki shim bun ka pisa katba kiwei kim ïoh dei ban pynkut noh, namar hap ban shai ba khlem ki ‘consultant’ yn ym lah ban leh eiei.
