Shillong, Lber 10
U MLA ka Liang Pyrshah na ka All India Trinamool Congress (AITC), Bah Charles Pyngrope, u la ong ba lada ka Sorkar ka lah ban pynbor ïa ki skul ha nongbah Shillong ban pyndonkam da ka STEMS bos kan pynduna war na ka jingkhapngiah bad dheng kali hapoh sor.
Haba shim bynta ha ka jingkren halor ka Mang Tyngka ha ka Lah Sngi U Blei, u MLA na Nongthymmai u la ong ba katkum ba la paw ha ka jingthoh, kumba 60 percent na ki kmie ki kpa ki leit buh skul da kaba ïaid tang kumba 500 meter eiei haba pyndonkam da ki bos ba pynïaid ka STEMS, kumba 65 percent ki ap ïa ki khun tang hapoh 5 minit kaba mynshwa ki ap haduh 88 minit, 88 percent ki sngewhun ïa ka jingshakri jong ka STEMS, 94 percent ka jingkhuslai ki kmie ki kpa ka la hiar, 80 percent ki khynnah skul ki duna ka jingsngew kulmar haba ïaid sha skul bad ki ïakynduh paralok thymmai ruh haba pyndonkam da ka STEMS.
“Lada ngi pynbor ban pyndonkam beit da ki bos STEMS ha baroh ki skul kiba don ha sor Shillong, ka jingdheng kali kan hiar beit war, ka ban ïarap ruh ban ïoh kunai pisa ïa ki longïing bad ai kam ruh ïa ki nongñiah kali bad ki nongbud”, u la ong.
U Bah Charles u la ong ba kumba ka paw ka STEMS ka la lah shisha ban trei, bad dei ban ïatreilang ban pynthikna ba baroh ki skul ki dei ban sdang pyndonkam noh da kine ki bos, hangta ka jingpyndonkam ïa ki kali shimet tang ban leit sha skul kan duna haduh ba kan ïarap pyllait na ka dheng kali.
Ha kaba ïadei bad ka jingieh sah ïa ki kali ba julor bad sniew ha ki rud surok, u Bah Charles Pyngrope u la kyntu ïa ka Sorkar ba kan ithuh ïa ki jaka ban buh ïa ki kali kiba shah tan ne julor na ki aksiden, khnang ba kita ki kali kim dei ban pynkhapngiah ïa ki surok bad ban ym ktah ïa kiwei kiba leit bad wan.
