Shillong, Lber 10
U Myntri Rangbah ka Jylla, Conrad K. Sangma ha ka Lah Sngi U Blei u la ong ba ka Sorkar Jylla ka la kyrpad na ka Sorkar Pdeng ban pynbna noh ïa ka kam tih marpoh khyndew kumba la leh barabor (Traditional Mining) kum ka kam ka bym don jingïadei bad ka kam tih marpoh khyndew (Non-mining Activity) ha kaba ïadei bad ka jingtih maw tih shyiap.
Haba jubab ïa ka jingkylli ba la wanrah da u MLA ka Voice of the People Party (VPP) na Mawryngkneng, Bah Heavingstone Kharpran, u Sangma u la ong ba ka jingtih maw tih shyiap hapoh ka Jylla ka dei kaba la buh kyndon katkum ki kyndon jong ka Meghalaya Minor Mineral Concession Rules, (MMMCR) 2016, kaba long katkum ka ‘Section’ 15 jong ka Mines and Minerals (Development and Regulation) Act, 1957.
U Myntri Rangbah u la ong ruh ba ka Sorkar Jylla ka la buh ka jingkyrpad hakhmat ka Sorkar Pdeng halor kane ka bynta bad ïa mynta, ka dang ïai ap ïa ka rai ne ka kyntien na bynta ka jingmynjur.
“Ngi dang trei ban ïoh ïa ka jingbit na ka Sorkar Pdeng ban ai lad ïa ngi ban pynbna ïa ka kam tih marpoh khyndew kumba la leh barabor (Traditional Mining) kum ki kam ki bym don jingïadei bad ki kam tih marpoh khyndew (Non-mining Activities),” la ong u Sangma.
Ha kajuh ka por, u la pyntip ba la thaw ïa ka komiti ryngkat bad ki nongshim bynta bapher-bapher ba kynthup ïa ki nongthaw aiñ bad ki ophisar na ka tnad Mining bad Geology, tnad khlaw bad ki nongtih marpoh khyndew ha kaba la pynlong ruh ïa ar tylli ki jingïalang haduh mynta.
U Sangma u la ong ba ka komiti ka la lap ba ïa ki jingtbit haba ïadei bad ka jingtih marpoh khyndew kumba ju leh barabor bad ka jingtih maw tih shyiap ki donkam ban long kiba suk bad ki bym eh.
“Ka komiti ka la ai jingmut ba na ka bynta ki nongtih marpoh khyndew kiba rit, dei ban pynlong kongsan tang ïa ar tylli ki kot ki sla ban ïoh ïa ka jingbit – ban ïoh ïa ka jingbit na ka tnad khlaw ban pyntikna ba kam dei ka jaka khlaw bad ban ïoh ïa ka syrnot ‘No-objection Certificate’ na u Rangbah Shnong ban pyntikna ïa ka jinglong trai ïa ka jaka,” la ong u Myntri Rangbah.
Da kaba pynshong nongrim halor kane ka jingai jingmut, u Sangma u la ong ba ka Sorkar Jylla ka la kynjoh ïa ka Sorkar Pdeng ban ïoh ïa ka jingmynjur bad ban ai jingïarap sha ki nongtih marpoh khyndew kiba rit jong ka Jylla ban ïoh ïa ka jingbit kaba donkam.
