Mawkyrwat, Lber 10
Ka long ka jingkyrkhu shikatdei eh ïa ki paidbah nongpang jong ka thaiñ Mawkyrwat bad ka South West Khasi Hills District hi baroh kawei lada phai sha ka Civil Hospital Mawkyr-wat kaba mynta. Kane ka jaka ai jingsumar ka la lah ban trei kham bha khamtam ha kaba ïadei bad ka jingpuid ïa ki nongpang.
Ha ka 6 tarik u Lber 2025, ki doktor jong ka Civil Hospital Mawkyrwat ki la lah ban sei sa ïa uwei u kynja khñiang (Cysts) ne ka pla pun-um na kawei ka longkmie uba khia haduh 5 kilo 7 spah gram bad ka jingjrong kumba 32 centimeter bad 22 centimeter ka pyngkiang.
Katei ka longkmie kaba la shah sumar ka dei ka Kong Anjellos Lyngkhoi, 50 snem, na ka shnong Ngunraw ha South West Khasi Hills District kaba jngai kumba 27 km eiei na Mawkyrwat.
Na ka liang jong ka Kong Lyngkhoi, ka la pynpaw ka jingaikhublei bad sngewnguh ïa ki doktor, ki nos bad ïa baroh ki nongtrei jong ka Civil Hospital Mawkyrwat kiba la lah ban sumar bad pynïoh jingkhiah biang ïa ka.
Katkum ka jingïathuh ka Kong Lyngkhoi ka la ong, ka jingshitom ha ka met jong ka, ka dei naduh mynshem snem bad dei ha u bnai Jymmang 2024 ba ka la sdang ban sngewthuh ïa kane ka jingpang bad ka la ïathuh ruh ba ka la pyrshang ban wad jingsumar bun tylli ki jaka hynrei kam ïarap.
Shuh shuh, ka Kong Lyngkhoi ka la ïathuh ruh ba dei lyngba ka jingai jingmut jong ki para shnong ba ka la leit ban pyrshang phah sumar noh ha u Dr. Daniel Suting uba dei u Surgery Junior Specialist jong ka Civil Hospital Mawkyrwat bad haba la leh ïa ki test la lap ba don u kynja khñiang hapoh ka met jong ka.
Na ka liang u Dr. Suting ruh u la ïathuh ba ka jingsumar ka ïaid beit bad kam don kano-kano ka jingktah ne ka jingshitom hadien ba la dep ban puid bad u la ïathuh ruh ba i nongpang mynta i la khlaiñ bad ha ka 10 tarik u Lber 2025 la pyllait noh ïa i ban in leit phai noh sha la ïing.
Ka Kong Lyngkhoi ka la ïathuh ruh ba naduh ba la weng ïa une u khñiang mynta ka la kham khlaiñ bad sngew sting ka met ka phad.
