Nongstoiñ, Lber 11
Hadien ka jingïoh ïa ka jingud jingnam na ki paidbah halor ka jingbym pat treikam thikna jong ka block ophis, ha ka 11 tarik u bnai Lber 2025, ka Federation of Khasi Jaiñtia and Garo People (FKJGP) Rambrai Circle ka la leit ban jurip kyndit ïa ka Rambrai C&RD Block ha kaba kala lap ba ym shym la don satia ki nongtrei.
U President ka FKJGP Rambrai Circle Bah Jistarlan Lyngkhoi u la ong, ka seng ha ka jingjurip ka la lap ba ha katei ka sngi katei ka ophis kam don wat tang uwei ruh u nongtrei bad kane ka la pynlyngngoh ïa ki dkhot jong ka seng namar katkum ka jinglap jong ki lyngba ka aiñ wad jingtip ne ka RTI, la lap ba ki don tang ki nongtrei na bynta ki operator jong ka skhim MGNREGA bad PMAY-G kata 6 ngut hynrei kine ruh ki don tang ha ka kot sada ym hapoh ka ophis treikam.
U Bah Jistarlan Lyngkhoi u la ong, kumba ka paw ha katei ka ophis Block ha Rambrai, ki nongtrei ki don tang ha ka kot hynrei ha ophis kim don bad ha kajuh ka por u la ong ruh ba u BDO ba pura ruh um don nalor ka building ruh kam pat don ïa kaba pura.
Halor kane ka bynta, ka FKJGP ka dawa na ka Sorkar ba ka dei ban thung noh ïa u BDO ba pura bad kumjuh ban shna noh ïa ka building kaba pura na ka bynta ka Rambrai C&RD Block, khnang ba u paidbah ka dong ka thaiñ Rambrai kin ïoh ïa ki jingdonkam kumba ïoh lem kiwei ki nongshong shnong ha kiwei ki bynta jong ka Jylla.
