Shillong, Lber 11
U MLA ka VPP na North Shillong Konstitwensi, Bah Adelbert Nongrum, u la ong ba ka jingduk kam dei namar bym lah pynbiang ïa kiba duk hynrei ka dei namar bym lah ban pynhun ïa kiba riewspah.
Ïa kine ki kyntien u Bah Adelbert Nongrum u la kren da ka Khasi hadien ba u la kren ha ïingdorbar thawaiñ ha ka Sngi Ba-ar, haba u la bynrap ïa ka jingkylli kaba u la buh halor ka jingtreikam ki Self Help Group (SHG) ha jaka sor ha ki kynta kylli jingkylli.
Haba jubab ïa ka jingkylli, u Symbud Myntri Rangbah ka jylla, Bah Sniawbhalang Dhar, u la ïathuh ba ki don haduh 41 tylli ki self help group ki bym treikam shuh hynrei ka Sorkar ka kwah ba kine ki SHG bym treikam shuh kin treikam biang.
U Bah Sniawbhalang u la ïathuh ba ïa ki SHG ha sor la mang pisa shiphew hajar tyngka kum ka jingkyrshan ïa ki haba ki sdang treikam na ka ‘national urban livelihood mission’ bad ïa ki SHG ha nongkyndong la ai ar hajar sanspah tyngka na ka’national rural livelihood mission’.
Shuh shuh u la ïathuh ba naduh u snem 2014 ki don 510 tylli ki SHG kiba la pynrung kyrteng ha jaka sor kaba hap ha NURLM.
Haba bynrap ïa ka jubab, u Myntri Rangbah ka jylla, Conrad K Sangma u la ong, kane ka jingkyrshan pisa ïa ki SHG na ka NURM bad NRLM ka dei beit ba la mang pisa da ka Sorkar India. Kumta ka Sorkar ka la phah jingkyrpad ïa ka Sorkar India ba kan pynkiew biang ïa ka pisa na ka 10 hajar sha ka 25 hajar tyngka.
Na ka liang u Bah Adelbert u la ong ba kumno ka Sorkar ka khmih lynti ba ki kynthei kin kamai shi lak shi snem lada ki ïoh tang 10 hajar tyngka dei hangne u la ong ba ka jingduk kam dei bym lah pynbiang ïa kiba duk hynrei bym lah pynhun ïa kiba riewspah.
