Shillong, Lber 11
U President ka Hynñiewtrep Youths’ Council (HYC), Bah Roykupar Synrem u la ïoh ban leit ïashim bynta ha ka jingïalang jong ka North East Student and Youth Parliament 2025 ïa kaba la pynlong da ka Akhil Bharatiya Vidyarthi Parishad (ABVP) ha kaba u Union Home Minister, Amit Shah, u la long kum kongan ha kaba ki sengbhalang napoh ka Jylla kum ka Hynñiewtrep Youths’ Council (HYC), ka Federation of Khasi Jaiñtia Garo People (FKJGP), ka Ri-Bhoi Youth Federation (RBYF), ka Jaiñtia Student Movement (JSM) bad kiwei pat ki la ïoh ban ïashim bynta lang.
Ha kane ka parliament kaba shi sngi ka la don ruh ban ïamir jingmut hapdeng ki nongshah khot sngewbha ha ka AVBP bad u Amit Shah. Ha kawei na kane ka jingïamir jingmut u President ka HYC u la ïoh ka lad ban pynsngew ïa ki mat jingeh kiba kum ka jylla ka ïakynduh kiba long ruh kum ki mat jingdawa kiba ka seng ka la buh.
U Bah Roykupar u la ong, “Ka jingangnud jong ka Sorkar India ban wanrah ïa ka lynti rel ha baroh ki sorbah jong ka India ki lah ban ym urlong namar kumba ka long ha Shillong, u la pynpaw ba kane ka lah ban sahkut marwei namar ka jingbymdon ki aiñ ïada na ka jingwan rung kyrthep ki briew kiba na bar,” u la ong. Kumta u la kyntu ba lyngba kane ka Forum kin pynsngew sha ka Sorkar India ba kan ai shwa ki Aiñ ïada ri bad kumta yn sa lah ban pdiang kylluid mynsiem ïa ka rel hapoh ka Jylla.
U Bah Roy u la pyntip ruh ba ha kine ki khyndiat snem ba la leit ki la don ki ‘Youtubers’ na Bangladesh ki la pyni lyngba ki rynsan ‘social media’ ba kumno ki ïoh ka lad ban rung laitluid sha ka Jylla Meghalaya na ki jaka khappud ba la ker sainar shiah. “Kane ka pyni ba wat la ïa kine ki jaka khappud kiba la ker ne ki bym pat ker ki long ki bym don ka jingshong shngiañ,”u la ong.
U la ong kane ka la dei ka por ba ka Sorkar India ka dei ban shim ïa ki sienjam kiba lah ban pynthikna ba ki jaka khappud kin long kiba la ker sainar shiah ne kiba shngaiñ.
“Ka jingkwah ka jong ngi ba kine ki jaka khappud kin long kiba shngaiñ namar ba ngi ki Khasi bad Jaiñtia ngi dei kiba rit paid haba ngi ïanujor bad ka jingbunpaid ki jaidbynriew kiba don hapoh India,” u la ong. U la ong ruh ba ngi buh ïa ka jingieid ïa ka ri ha khmat hynrei na ka bynta jong ngi, kum ki khasi ngin shim ba kan kham bha ban ieid nyngkong ïa ka jaidbynriew.
“Lada ngim lah ban ïada ïa ka jaidbynriew ngi don hapdeng ka jingma ba shisien ka sngi lada kine ki bar jylla kiba wan ban buhai shnong khlem da lah ban leh ei-ei ngin sa kylla long ki rit paid ha la ka jong ka jylla,” u la ong. Kumta ngi kwah ba ka Sorkar India ba kin wad ki lad ki lynti ha ka ban khmih bniah ïa kine kiba wan rung be-aiñ.
Ha kajuh ka por u Bah Roykupar u la kren ruh shaphang ka jingjyllei jong u drok hapoh ka Jylla Meghalaya da kaba pynpaw, “Ka jylla kaba don ka jingbun briew kumba 30 lak ngut tam bad kumba 3 lak ngut ki samla ne ki nongshong shnong ki dei kiba pyndonkam drok,” u la ong.
U Bah Roykupar u la ong ruh ba ngi la mih shakhmat ban ïakhun pyrshad ïa une jingdih pynbuaid, ngi la pynbor ïa ka sorkar jylla ba kan pyntreikam ïa ki aiñ jong ka NDPS Act bad kane ka la wan urlong hadien shibun ki jingïakhih kiba ngi la pynlong. U la ong ruh ba ngi sngewthuh ba ka jylla ka dei ka jaka rung jaka mih bad kane ka la pynlong ïa kine ki nongkhaïi drok na kiwei pat ki jylla ba kin pynlong ïa ki samla ka jylla kum ki ‘langkñia.
“Ngim lah ban kren halor ka roi ka par ne ka shong suk shong shngaiñ lada 10% ki samla ki dei ki nongpyndonkam drok, lada ngi kwah ba ka Meghalaya kan dei shi bynta na ka India, nga kyrpad ïa ka sorkar India ba ka dei ban shim ïa ki sienjam ban pynthikna ba u drok ym dei ban don ka jingkhaïi hapoh ka Jylla namar ba ka jylla kam dei kaba pynmih drok na ka hynrei la wanrah na sha kiwei pat ki jylla ne wat shabar ka ri ruh,” u la ong .
“Ban pynthikna ba u drok um dei ban ïoh rung hapoh ka jylla bad ha baroh ka thaiñ shatei lam mihngi ka ri, ngi dawa na ka sorkar jylla kumjuh ïa ka sorkar pdeng ba ka shlem treikam jong ka Narcotic Control Bureau ka dei ban don ruh hapoh ka Jylla Meghalaya khamtam ha Shillong khnang ba kin lah ban shim ïa ki sienjam ki ban lah ban pynthikna ba u drok um dei ban ïoh rung ne ban khaïi hapoh ka jylla,” u la pynkut.
