Shillong, Lber 11
U President ka Khasi Students’ Union (KSU), Bah Lambokstarwell Marngar u la ong ba ka seng ka kren da kaba shai sha baroh ki Myntri hapoh ka Sorkar ban sangeh noh ka jingkren shaphang ka lynti rel.
“Ym dei tang ïa uwei, hynrei sha baroh ki Myntri Sorkar kiba kwah shong rel palat ban sangeh noh ka jingkren shaphang ka lynti rel”, la ong u Nongïalam ka KSU haba kren ha ka por ba leit tur sha Ïingdorbar Thaw Aiñ ha ka sngi Ba-ar.
Haba pynrem ïa ka jingkren u Myntri Sorkar uba dei u MLA ka UDP, na ka liang u Nongïalam ka KSU u la ong ba ka KSU ka don ha kylleng jong ka Bri Hynñiewtrep bad ka dei kawei ka thymmei.
“Ka jingkren u Myntri Sorkar ba u ong kiba nabar, ngi kwah ban kylli, mano kita kiba nabar? Wat ym pyrshang ban pharia ïa ka jaidbynriew, ngi don ka hok ban tuklar ha kano-kano ka jaka ruh bad ym don mano-mano ba lah ban khang ïa ka KSU ha kano-kano ka jaka ruh haba ngi ïeng ban pyrshah ïa ka jingma kaba ap ïa ka jaidbynriew”, u la ong.
Ha kaba ïadei bad ka jingsahteng ka Inner Line Permit ban pyntreikam, u Bah Lambok u la ong ba ka Sorkar ka la mynjur ïa ka rai ‘resolution’ naduh u snem 2019, hynrei mynta ka rieh tngen beit da kaba ong ba ka shong ha ka kti jong ka Sorkar India.
“Imat ki leit sha Delhi kim ïakren tang ïa ka ILP ki ïakren shaphang ka lynti rel ruh. Ngi la kren shai sha ka Sorkar ba kata ka T.300 klur ba ka Sorkar Kmie ka la dep ai na ka bynta ban shna ïa ka lynti rel pynphai noh pan noh da ka ILP, ha kata ka por ngin sa ïapeit ïa ka lynti rel. Ka aiñ ba la don lypa ruh, ka MRSSA naduh 2016 i kumba set synduk sah haduh mynta, ngin ïakren shuh kumno”, la ong u Bah Lambok Marngar.
