Shillong, Lber 11
Ka tnat pule puthi ka Sorkar Jylla ka la buh thong biang ban pyndep noh ban shna ïa ka Science and Commerce College ha Mawphlang hapoh u Lber 2025, katba ïa ka Science and Commerce College ha Bahsapara la buh thong ban pyndep haduh u Lber 2026.
Ka jingsahteng jong kine ar tylli ki jaka pule ka la ïaid hynñiew snem naduh ba la mang pisa ka Sorkar India ha ka 30 tarik Jylliew, 2017, hynrei ka Sorkar ka la buh thong biang ïa kine kolej, ka dei ba la jubab da u Myntri ka tnat pule puthi u Rakkam A Sangma haba buh jingkylli da u Nongïalam ka Liang Pyrshah u Dr. Mukul Sangma ha ki kynta kylli jingkylli ha ka ïingdorbar mang tyngka kaba dang ïaid shakhmat.
U Rakkam u la ïathuh ba ka Science and Commerce College Mawphlang, ka jingtrei ka la ïaid 86 percent kaba ka Sorkar India ka la pyllait haduh 31 klur tam ka pisa haduh ka jingpyllait pisa kaba saw sien kaba dei ha ka 8 tarik Risaw, 2024, na ka 36.55 klur tyngka kaba la mang pisa.
Shuh shuh, u Rakkam u la ïathuh ba ka jingtrei ïa ka Science and Commerce College ha Bahsapara ka long 66 percent ha kaba ka Sorkar India ka la pyllait pisa tang 23 klur tyngka tam haduh ka 28 tarik Risaw 2024 kaba dei ka jingpyllait pisa kaba lai sien kaba ka Sorkar India ka la mang haduh 36.31 klur tyngka.
U la pyntip ba ïa kitei ar tylli kolej la pyntrei da ka tnat PWD (buildings), ka la pynkhreh ban ïoh jingmynjur ban thung mar 46 ngut ki nonghikai, ka jingpynkhreh ban tan bording, ka um bad ka surok.
U la pyntip ruh ba ka Sorkar India ka la mang pisa ïa kine ar tylli kolej ha ka 30 tarik Jylliew 2017.
Ïa ka kolej ha Mawphlang la pyllait pisa nyngkong ha ka 1 tarik Naiwieng 2018 kaba la kot 11.06 klur tyngka katba ïa ka kolej ha Bahsapara la pyllait pisa nyngkong ha ka 28 tarik Nailur 2017 kaba kot sha ka 12 klur tyngka.
