Shillong, Jylliew 30
Ha ka 30 tarik u Jylliew 2026, ka Meghalaya High Court ka la hukum ban pynsangeh noh shuwa ïa ka Personal Interview jong ka jingthungkam LDA cum Typist hapoh District Selection Committee (DSC), West Jaiñtia Hills, kaba la dei ban long ha ka 01 tarik u Naitung 2026.
Kane ka rai kadei na ka Single Bench u Justice HS Thangkhiew, ka la mih hadien ba u Bah Heihokmi Lamare bad lai ngut kiwei pat ki nongmudui, ki la kynnoh ba watla ki la pass ïa ka Written Examination, Typing Speed Test bad ka Local Language Test, hynrei ym shym la buh kyrteng ne shortlist ïa ki ban shah khot sha ka Personal Interview.
Na ka liang ka Sorkar, ka ong ba ha rukom thep kam, la bud ïa ka Office Memorandum jong ka 17 tarik u Naiwieng 2014, bad ba tang kiba ïoh ïa ki marks kiba biang hadien ka jingbishar ïa baroh ki bynta jong ka jingïakhun, ki la shah buh kyrteng.
Na ka bynta 34 tylli ki kam ba lait, 68 ngut ki kyrtong la khot sha ka interview.
Hynrei ka Ïingbishar ka la pynpaw ba ka dang don ka jingkylli halor ka rukom bishar bad ai jingkheiñ marks ha ka Typing Test bad Local Language Test bad kumta ka la shem, ba ka don kaei-kaei ka bym shai bad ka la hukum ban sangeh shuwa ïa ka Personal Interview haduh ka sien shong bishar kaba bud.
Ka Ïingbishar ka la bthah ruh ïa ka Sorkar ban wanrah ïa baroh ki record bad ban thep ïa ka affidavit bad sa bishar biang ïa kane ka mukotduma ha ka 21 tarik u Naitung, 2026.
