Shillong, Jylliew 30
Ki kam tuh kam thiem ki dang ïai bteng na kawei ka sngi sha kawei pat bad ïa kane lah ban sakhi na ki jingjia shah tuh ki arshaka, shah prong tuh ki ïing bad ki kali ka dang ïai jia ha kylleng ka nongbah Shillong bad wat sha kiwei ki bynta jong ka Jylla ruh kumjuh.
Katkum ka khubor kaba la ïoh na ki pulit la ong ba ka Kong PS Syiem ka la ai ka jingujor ba ha ka 27 tarik mynta u bnai, ha ka por kumba 2.30 mynsngi, ki runar bym lah ban ithuh, ki la tuh ïa ka laptop kaba shongdor kumba T.1,06,090/- na ka kali ka jong ka, kaba la pynïeng ha Don Bosco Square, Laitumkhrah, Shillong.
Katba na ka liang jong u Hoilam Hoakip u la ai ka jingujor ba ha ka miet jong ka 24 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-F-5769 na ka thaiñ Madanrting, Shillong.
Katba na ka liang jong u Jitendra Narayan Bhattacharjee pat u la ai ka jingujor ba ha ka 27 tarik mynta u bnai, ki runar bym lah ban ithuh, ki la prong tuh hapoh ka Departmental Cooperative Consumer’s Store jong u, kaba don ha RR Colony, Shillong bad ban tuh ïa ka pisa kaba long T.1 lak.
Ha kawei pat ka khubor, u F Wanñiang u la ai ka jingujor ba hapdeng ka 27 bad 28 tarik mynta u bnai, ki runar bym lah ban ithuh, ki la tuh ïa ki ‘copper wire’ kiba shongdor kumba T.20,000/- na kawei ka ‘bore well pump house’ kaba don ha 1st MLP, Mawiong campus, Shillong.
Ha kawei pat ka khubor, u Security Officer jong ka Eastern Air Command, 7 Mer, Upper Shillong u la ai ka jingujor ba ha ka 27 tarik mynta u bnai, ki runar bym lah ban ithuh ki la prong tuh ha ki jaka sah (quarters) kiba don ha Hq., EAC, Shillong, ha ka por ba ki nongsah kim shym la don satia.
Katba na ka liang jong u Ardaman Pyrbot u la ai ka jingujor ba ha ka 28 tarik mynta u bnai ba ki runar bym lah ban ithuh, ki la tuh ïa ka jingtah jingpein (cosmetic items) na ka kali jong u (ML05-AZ-0005) kaba la pynïeng ha GS Road, Shillong.
Ha ka step jong ka 27 tarik mynta u bnai, ki nongap pahara jong ka PA Sangma Stadium, Dakopgre, Tura (WGH), ki la bat noh ïa uwei u briew ba la tip kyrteng kum u Clever Marak (51 snem), katba u dang pyrshang ban tuh ïa ki nar rod na kane ka Stadium.
