Shillong, Jylliew 30
Ki pulit ha ka jingbteng ban khynra drok ki la ïoh ban kurup drok na ki ar jaka bad ruh ban kem noh ïa ki ar ngut ki briew ba la kynnoh donkti ha kane ka kam.
Katkum ka khubor kaba la ïoh na ki pulit la ong ba ha ka miet jong ka 28 tarik mynta u bnai, kata ha ka por kumba 8.45 eiei hadien ka jingïoh ïa ka jingtip, ki la pynlong ïa ka jingleit khynra ïa ka ïing sah jong uwei u briew ba tip kyrteng kum u Chiman Masih bad ka kurim jong u, ka Rani Masih ha them metor (Punjabi Lane), Shillong bad ïoh kurup haduh 77 tylli ki vials ne ki bilor plastic kiba rit kiba don u drok ba khia kumba 15.19 gram ba la suba ba u lah ban dei u heroin.
Ha kawei pat ka khubor, la ong ba ha ka janmiet jong ka 28 tarik mynta u bnai, ki pulit ANTF ki la kem noh ïa ki ar ngut ki briew ba kynthup ïa u Brian Nongmor (29 snem) bad u Govin Singh (27 snem) bad kurup na ki ïa u jingdih buaid ba khia kumba 5.96 gram na kawei ka jaka kaba dang hap hapoh ka thanad Madanrting, Shillong.
