Shillong, Jylliew 30
U Myntri Rangbah ka Jylla, u Conrad K. Sangma ha ka Sngi Ba-ar u la ong ba ka Megha-laya ka la ïoh ïa ka bhah kaba T.1100 klur na ka Sorkar Pdeng na ka bynta ki 9 bnai (banyngkong) haba ïadei bad ka jingpyntreikam ïa ka Viksit Bharat-Guarantee for Rozgar and Ajeevika Mission (Gramin) Act, 2025.
Kane ka long hadien ba ka Kynhun Myntri ka Jylla ka la pdiang ïa kane ka aiñ.
Kane ka aiñ bathymmai, kaba bujli ïa ka MGNREG Act, bad ka ban treikam naduh ka 1 tarik u Naitung, kan treikam haduh ka 31 tarik u Lber, 2027 na ka bynta kane ka kynti kaba mynta. U Conrad u la ong ba katei ka pisa kaba T.1100 klur ka dei ka jingmang kaba la mynjur da ka Sorkar India ïa ka Meghalaya na ka bynta kane ka samoi.
“Na ka bynta kane ka por kaba 9 bnai, naduh u Naitung haduh ka 31 tarik u Lber, ka jingmang sha ka Meghalaya ka long T.1100 klur,” la ong u Myntri Rangbah ka Jylla da kaba bynrap ba ïa ka ‘quarter’ banyngkong, kata naduh u bnai Ïaïong haduh u bnai Jylliew la pyntreikam katkum ki kyndon barim jong ka MGNREGS.
“Ka jingpyntreikam ïa kane ka aiñ thymmai kan sdang lashai ka sngi. Kumta naduh ka 1tarik Naitung haduh ka 31tarik Lber, 2027 ïa kane yn pyntreikam da ka Meghalaya. Hynrei naduh lashai ka sngi, ki kyndon bathymmai bad ka aiñ thymmai kan sa treikam,” u la ong.
U Conrad u la ban jur ba katba ïa ka T.1100 klur yn ïasam lang ha ka rukom kaba 90:10 hapdeng ka Sorkar Pdeng bad ka Jylla, kano-kano ka jingpynlut kaba palat ïa ka jingmang, dei ban bei da ka Meghalaya.
“Kaei kaba kongsan ban tip ha kane ka skhim ba kyrpang ka long ba ka T.1100 klur ka dei ka jingmang pisa kaba la buh bad lada kane ka jingmang kaba la buh ka ïaid palat na ka jingmang, lehse ngi pynlut noh T.1200 klur ha ka jaka jong ka T.1100 klur, ïa ka T.1100 klur, yn ïasam ha ka rukom kaba 90:10 ha kaba 90% la siew da ka Sorkar Pdeng bad 10% da ka Jylla hynrei haba ïadei bad ka jingïaid palat ïa ka jingmang kaba la buh, ki Jylla kin hap ban tip lut hi ïa ka pisa ba la pyndap shuh kaba phi pynlut,” u la ong.
Ka VB-G Ram G ka pynbha ïa ka aiñ MGNREG kaba hashuwa da kaba pynkiew ïa ki sngi trei na ka 100 sha ka 125 sngi bad ban pynheh ïa ka thup jong ki kam ba la shah naduh kumba 240-250 sha palat 320.
“Kumba phi tip, kane ka dei ka aiñ ka bathymmai ha ka jaka jong ka aiñ MGNREG bad ïa kane la pynbha mynta bad ki kyndon, kum na ka bynta ka sngi trei kaba 100 sngi, la pynkiew sha ka 125 sngi,” la ong u Conrad.
Ki projek kum ki surok bad ki lad pynïasoh, ki bym shym la buh hakhmat mynshuwa, mynta la buh hakhmat eh. Ïa ki Anganwadi Centre bad ki ïingskul, kiba hashuwa ym shym la shah hapoh ka MGNREGS, mynta la lah ban tei ïa ki.
Ka aiñ ka wanrah ruh ïa ki prokram ba kyrpang na ka bynta ki lad kamai, ryngkat ki kam kiba ïadei bad ka mariang, ka jingpynneh-pynsah ïa ka um bad ki khlaw ki btap.
“Ki prokram bapher-bapher na ka bynta ki lad kamai ki bym shym la shah ha kaba sdang, mynta lah ban shim ruh ïa ki prokram ba kyrpang na ka bynta ka lad kamai. Ki prokram bapher-bapher kiba ïadei bad ka mariang, ka jingpynneh-pynsah ïa ka um, ki khlaw ki btap – baroh kine ki prokram mynta lah ban shim,” bynrap biang u Conrad.
