Jowai, Lber 11
U Sub-Divisional Magistrate, Amlarem Civil Sub-Division u la pynjari da ka kyndon Section 163 BNSS ha kaba ïadei bad ka leit ka wan jong ki kali heh lyngba ka jingkieng Bridge No 1/1 kaba don ha wah Amphubon.
Kane ka jingpynjari kyndon ka long hadien ka jingujor jong u Assistant Executive Engineer PWD (Roads) Border Road Sub Division, Amlarem ba kane ka jingkieng kaba jngai 1 km na surok Muktapur-Borghat Road kam lah shuh ban kit ïa ki jingkit kiba khia palat ïa ka 9 metric ton.
Namar ba ka long kaba donkam, kumta na ka liang u Sub-Divisional Magistrate, Amlarem Civil Sub-Division u la pynmih ïa ka hukum kaba khang pyrshah ïa ki kali kiba kit palat ïa ka 9 metric ton ba kin ïaid lyngba kane ka jingkieng namar kan wanrah ka jingjulor kaba kham jur shuh shuh ïa ka jingkieng.
U Sub-Divisional Magistrate, Amlarem Civil Sub-Division u la kdew ruh ba katei ka surok ka dei kaba kongsan kaba pynïasoh ïa ki shnong khappud sha Dawki bad Amlarem.
Kumta baroh ki kali heh kiba ïaid lyngba ka jingkieng No 1/1 kaba don ha Wah Amphubon kaba don ha 1 km jong ka surok Muktapur – Borghat ba la khang ban kit palat 9 Metric Ton.
Kane ka hukum kan treikam noh mardor tad haduh ban da pynmih da kiwei pat ki hukum.
