Shillong, Lber 12
Ka BJP Meghalaya ka la pynpaw ka jingsngew-khia kaba jur halor ka kaiphod ba dang shen jong ka ‘World Air Quality’ da ka kompeni ‘Swiss Air Technology’ – IQAir kaba la ñiew ïa ka Byrnihat kum ka jaka kaba jaboh tam (ka lyer) ha ka pyrthei.
“Kane ka jingpynïapher kaba pynjah burom ka la wan kum ka jingkyndit sha ma la iwei-pa-iwei nongshong shnong ka Jylla uba sngewthuh ïa ka mariang – ka Jylla kaba ju shim barabor ïa ka jaka kaba wanrah ïa ka jingsarong ha ka ri na bynta ki sawdong-sawkun ba khuid bad suba,” ong u nongaiktien ba rangbah ka BJP, Bah Mariahom Kharkrang ha ka kyrwoh.
U la ong ruh ba kane ka dei ka risol kaba mih namar ka jingtlot ka jingpyntreikam bad ka jingbym don ki polisi kiba donkam ïa ka mon saiñ pyrthei kaba khlaiñ ban pyntreikam ïa ki.
“Ka roi ka par ka bym ïaid ha ka rukom ba dei, ki polisi ki bym treikam, ka jingbym beit ryntih ki kam khaïi-pateng bad ki jingbym ïohi jngai, ki la wanrah ïa kane ka jingjah burom kaba khraw ïa ka Jylla baitynnad jong ngi. Ngi khot ïa ka Sorkar ban shim ïa ki lad ki lynti ban pynbeit mardor, ban wanrah ïa ki saiñdur kiba biang kiba thaw da ki ‘riew shemphang bad ban pyntreikam ïa ki ha ryngkat ka jingpyrkhing ban shimkhia ïa kane ka bynta, khnang ba ki pateng ban wan kin ym ïakynduh jingeh ha ka liang ka koit ka khiah,” u la ong. Haba bynrap shuh-shuh, u la ong, “Ka Sorkar ka dei ban sngewthuh ba ki saiñdur pynroi kiba khlem da pyrkhat – kiba peit tang ïa ka jingmyntoi ha ka ïoh ka kot ki pynlong ïa ka jinglong-jingman kaba sniew ban kham sniew shuh-shuh.”
Haba kdew ba ka don ka jingthmu ban pynkylla ïa ka ‘Soil Conservation Training Institute’ ha Byrnihat sha ka jaka pdeng jong ki karkhana, u Bah Kharkrang u la ong, “Kane ka dei ka jingma kaba khraw. Ym tang ba kane ka pynlong ïa ka jinglong-jingman jong ka jingjaboh ha Byrnihat ban kham sniew shuh-shuh, hynrei ka ktah jur ïa ka lynti ïaid jong ki hati, kaba ïalam pat sha ka jingthut, kaba lah ban jia ïa ka mariang kaba la tlot lypa bad ki katto-katne ki jingïatyngkhuh hapdeng ki mrad bad u briew – ryngkat ki jingma kiba khraw.”
Shuh shuh haba bynrap ba ka kam ba ïadei bad ka ïoh ka kot ka long kaba donkam, u la ong ba ka Sorkar ha kawei ka liang dei ban long kaba husiar bad buh jingmut ïa baroh ki bynta haba jied ïa ka jaka na ka bynta kano-kano ka kam. “Ka jingshim rai ba kyrkieh ka pynmih tang ïa ki jingeh kiba jur; ha man la ka por. Ngin kwah ban kyntu ïa ka Sorkar ban shimkhia ïa kane ka kaiphod bad ban jied bujli ïa ka jaka na bynta ban pynïeng ïa ki karkhana, hadien ba la pule bad pyrkhat sani bha,” u la ong.
