Nongpoh, Lber 12
Ka jingjur jong ki jingjia tyngkhuh kali kaba la wanrah ïa ka jingjia ba sngewsih ha ka surokbah National Highway 6 ka la pynlong ïa ki bor pulit na ka thanat Nongpoh kiba pynïaid kali ban shimkhia bad pynlong ïa ka jingïalang pynshai paidbah ïa ki nongñiah kali ba ki dei ban bud ryntih ïa ki kyndon ñiah kali ban lait na kino-kino ki jingjia ba sngewsih bad ruh khnang ba ki paidbah nongleit nongwan kin don ha ka jingshngaiñ.
Haba kren sha ki lad pathai khubor, uwei na ki ophisar ka Traffic Branch ka thanat Nongpoh, u Bah B Thangkhiew u la buh ka jingkyntu jur ïa ki nongñiah kali ba ki dei ban ñiah da ka akor ka burom, ba kin bud ryntih ïa ki kyndon ñiah kali bad pynbiang ïa ki kot ki sla jong ki kali bad ruh jong u nongñiah kum ka laisen.
Utei u heh pulit u la kyntu ïa ki trai jong ki kali kamai khamtam ki Auto-rickshaw kiba kamai ha Nongpoh, ba haba ki ai ñiah ïano-ïano, ki dei ban da khmih bniah shwa ba uta u nongñiah u dei ban don ïa ka laisen kum shi bynta ban wanrah jingshngaiñ ïa ki paidbah nongleit nongwan ba kynthup ïa ki kynthei bad khyllung khynnah bad pyntip ruh ba lada don kiba ïaid lait ïa kane, u trai jong ka kali ruh un shah pynshitom lang kumba ngat u nongñiah.
U Bah Thangkhiew u la u pynpaw ruh ïa ka jingsngewsih ba wat hadien ba ki bor pulit na ka por sha ka por ki ju ai jingpynshai paidbah halor ki kyndon ñiah kali, hynrei ki dang don kiba ïaleh pyrshah bad ñiah khlem-a-kor bad ym kheiñ snep shuh wat ïa ka jingim briew ruh khamtam hadien ka jingshoh khawiang, kaba la wanrah ïa ka jingduh jong ki mynsiem ba lui lui.
Halor ka jingpynher sted ïa ki kali bad ka jingñiah buaid, u la ong ba kane ka jingleh ‘hero’ leh aktor ka dei ka kam kaba poi sha khlaw khamtam ba ki kuna ïa kito kiba pynkheiñ ruh ka la kiew bun shah. Halor kane ka bynta utei u heh pulit, u la buh ka jingkyntu ïa ki nongñiah kali ba ki dei ban burom ïa ka aiñ bad ba lada don kino kino ki bym sngewthuh ruh ïa ki kyndon ñiah kali, ki lah ban wan mih sha thanad Nongpoh ban kynduh ïa ki pulit pynïaid kali ban ïoh ïa ka jingshai kaba paka.
U President ka NRAODA, u Bah Banasar Lyngdoh Nonglait u la kyntu ïa ki para nongñiah bad trai kali kamai Auto-rickshaw ba nangne shakhmat ki dei ban pynbiang ïa ki kot ki sla kali jong ki bad ka laisen kum shi bynta ban wanrah ïa ka jingshngaiñ ïa ki paidbah nongleit nongwan bad ruh ban bud ryntih ïa ki kyndon aiñ kiba la buh da ka Sorkar.
U Bah Banasar u la maham ruh ba nangne shakhmat, ki nongñiah kali kamai Auto-rickshaw kim dei shuh ban kamai kali haba kila dih kyiad ne buaid namar kane ym tang ba ka buh jingma ïa ki nongleit, hynrei ka long pyrshah ïa ka aiñ, da kaba kdew kumba long mynta, ka kuna ïa kiba ñiah kali ynda la buaid ka dei haduh T.10 hajar, kaba u la ong ba teng teng ha ka por ba la buaid i kumba ki lah ban siew wat ïa ka kuna kaba T.20 hajar ruh, hynrei ha pla tang 2 hajar ruh ym don.
Utei u nongïalam u la pynpaw ruh ïa ka jingsngew bynñiaw ba ki don bun ruh na ki nongñiah kali kamai Auto-rickshaw ki bym don wat tang ka laisen ruh kaba lah ban ïoh tang 1500-3000 namar ka jingkheiñ sting bad jingbym shimkhia, hynrei ban pynlut kamkai ha ki jaka khalai ki don pisa. U la byrthen ruh ba nangne shakhmat kum ka seng kaba peit ïa ka bha ka miat ki para nongñiah Auto-rickshaw lada ka lap ïa kiba pynkheiñ kyndon kum ka jingdih kyiad ha ka por kamai bad kiwei kiwei de, kum ki nongïalam kin dei maki hi nyngkong ki ban ai jingtip sha ki bor pulit ban phah kem bad ban ngat ha ki kyndon jong ka aiñ da ka jingïatreilang ryngkat ryngkat bad ki bor pulit ka thanat Nongpoh.
