Nongpoh, Lber 12
Kumba lai ngut ki briew kiba shong ha kawei ka kali kamai Auto-rickshaw ki la mynsaw hadien ka jingshah tynrah ha ka Maruti Alto ha ki bynta jong ka jaka phai kali (junction) ka surokbah National Highway 6 marjan bad ka Bethany Hospital Outreach ha Pahamsyiem.
Katkum ka tyllong khubor ba la ïoh lum na ki bor pulit, la ïathuh ba katei ka jingjia ka dei ha ki por kumba 6:45 baje janmiet jong ka Sngi Ba-ar, katba katei ka kali kamai Auto-rickshaw kaba don ïa u registration number ML10-A-7293 kaba la ñiah da u Bah Bankerlang Kshiar ka dang mih na Saiden ban leit sha Nongpoh lem bad ar ngut ki briew kiba shong hadien ïa kiba la tip kyrteng kum u Md Ramjan Ali, 45 snem ka rta na ka dong Mawkapiah bad u samla Damewanshwa Khriam, 18 snem ka rta na ka shnong Umjarasi. La ïathuh ruh ynda poi ha ki bynta jong ka lad Bethany Hospital Outreach, katei ka kali Alto kaba don ïa u registration number WB20-B-8521 kaba la ñiah da u Bah Pynhun Marsing, 27 snem ka rta hapdeng ka jingshoh khawiang, u la leit ban tynrah nadien jong katei ka Auto-rickshaw kaba pynlong ïa ki ar ngut kiba shong hadien ka Auto-rickshaw ban ngat ha ka jingmynsaw.
Na ka liang ki bor pulit ki la pynkit noh mar mar ïa Md Ramjan Ali bad u samla Damewanshwa Khriam sha Nongpoh Civil Hospital na ka bynta ban pynïoh ïa ka jingsumar ba kyrkieh hynrei namar ka jingjur jong ka jingmynsaw, ïa u samla Damewanshwa Khriam, ki doktor ki la bthah ban rah noh sha kawei pat ka jaka ai jingsumar kaba kham heh. Halor kane ka jingjia, na ka liang ki bor pulit ka thanat Nongpoh, ki la rah noh ïa baroh ar tylli ki kali kiba ngat ha kane ka jingjia sha thanat Nongpoh na ka bynta ban leh ïa kaba donkam katkum ki kyndon jong ka aiñ.
