Shillong, Lber 12
U MLA ka VPP na Nongkrem Konstitwensi, Bah Ardent M Basaiawmoit, u la ong ba ka tnat Excise ka la pheil haba kam tip haba ka don ka karkhana shna kyiad beaiñ ha Umïam kaba la paw pyrthei dang shen haba ki pulit ka jylla bad pulit Assam ki la leit ban khynra.
U Bah Ardent u la pynpaw ïa kane haba u wanrah da ka ‘cut motion’ halor ka jingtreikam ka tnat Excise haba dang ïaid ka dorbar mang tyngka kaba long ha ka sngi Balang.
U Bah Ardent u la ong ba ka tnat Excise ka dei kaba ju lum khajna bun bha na ka kyiad hapoh ka jylla. U la pynpaw ba ha kine ki sngi u la ïohi ba ki pulit Assam ki la leit khynra ïa ka karkhana shna kyiad beaiñ ha Umïam bad kane ka pyni ba ka tnat ka la pheil ha ka jingtreikam.
U la ong lada ka tnat ka la pheil, u kwah ban tip kumno ka tnat ka lah ban peitngor ïa ka jingshna beaiñ ïa ki karkhana shna kyiad hapoh ka jylla.
Kum ban shu pynkynmaw, kane ka jinglap ïa ka karkhana shna kyiad beaiñ ha Umïam ka dei hadien ba ka tnat Excise na Assam ka la ïoh bat ïa ka trok ha Khanapara bad hadien ba la tohkit la lap ba ka don ka karkhana shna kyiad beaiñ ha Umïam.
