Shillong, Lber 12
Ha kawei ka jingjia suba shah thang kali kaba la jia ha ka step phyrngab jong ka 12 tarik u Lber, 2025, kawei ka kali Maruti Swift Dzire ronglieh kaba don ïa u registration number ML05-AB-1290 bad kaba dei ka kali jong ka Sorkar ka la shah thang katba ka dang pynïeng ha ka shnong Nongmensong Dong Kadiang.
Katkum ki tyllong khubor kiba la ïohlum, la ïathuh ba katei ka kali ka dei ba la pyndonkam da ka ophis Meghalaya Infrastructure Development Finance Corporation (MFIDC) bad ha katei ka jingshah thang ka la don ka jingjulor na ka bynta shakhmat.
La ïathuh ba na ka liang ki pulit ka Nongmensong Outpost ki la ïoh jingtip halor katei ka jingjia ha ka por kumba 3 baje mynstep.
Na ka liang ka kynhun Forensic Crime Scene Unit (FSCU) ka la pynlong ïa ka jingtohkit halor katei ka jingjia ha ryngkat ka jinglum-jinglang ïa ki sakhi na katei ka jaka ba shah thang katei ka kali bad ha ryngkat ka jingpeit ruh lyngba ki kor ringdur lane ki CCTV Camera ba la pyndait ha ki dukan kiba don hajan katei ka jaka ban lap ksai ïa kino-kino ki briew kiba donkti ha ka ban wiang ding ïa katei ka kali.
Na ka liang ki bor pulit ruh, ki dang pynlong ïa ka jingtohkit ban lap ïa ki briew kiba donkti ha kane ka jingjia.
Halor kane ka jingjia, u Superintendent of Police (SP) ka East Khasi Hills District, Bah Vivek Syiem, u la ong ba ka shongsuk-shongsaiñ hapoh ka Jylla, ka la kham synjor hadien ka jingjia leit tur kynsan jong ka Khasi Students’ Union (KSU) ha ka step jong ka 11 tarik u Lber, 2025 ha Garrison Bridge da ka jingthmu ban leit sha ïingdorbar thawaiñ ka Jylla ha Rilbong ban pynpaw ïa ka jingpyrshah kaba jur halor ka jingthmu ban wanrah ïa ka lynti rel hapoh ka Jylla bad kumjuh ban pyntreikam ïa ka Meghalaya State Investment Promotion & Facilitation (MSIPF) Act, 2024.
U SP u la ong ba kane ka jingshah thang ki kali ka la jia ha ki ar jaka ha nongbah Shillong ha kaba kawei ka dei kaba la jia ha Nongmensong bad kawei pat ka jingshah thang ka kali Alto kaba la jia ha ka phyllaw jong ka NF Railway Officer’s Rest House kaba don ha Laban kaba dei jong u nongshet jingshet jong katei ka jaka ha kaba baroh ar tylli kine ki kali ki la ingkhong na ki katto-katne ki bynta.
U la ong ba na ka liang ka tnat pulit ka la long kaba peitngor bad kaba pynkhlaiñ ïa ka rukom treikam jong ka khnang ban wanrah ïa ka shongsuk-shongsaiñ jong ki paidbah ka Jylla.
“Haba ïadei bad kine ki jingjia, ngi lah ban sngewthuh ba lehse, ka dei na ka daw ka jingjia myn-hynnin bad ngi la long kiba peitngor bha ha kiba bun ki jaka khnang ban pynthikna ba ka shongsuk-shongsaiñ na ka bynta ki paidbah nongleit-nongwan,” ong u Bah Vivek.
Shuh-shuh, u la ong ba kala don ruh ka jingmaham ïa ki ophisar bad ki kali Sorkar ba kin peit pyrkhing bha haba ki pynïeng ïa ki kali jong ki ha kino-kino ki jaka khnang ba kum kane ka jingjia shah wiang ding ki kali kan nym don.
