Shillong, Lber 12
U Symbud Lamphang ka Ïingdorbar Thawaiñ ka Jylla, Timothy D. Shira ha ka Sngi Balang u la mudui mukotduma pynjah burom pyrshah ïa 2 ngut ki briew halor ka jingkynnoh pynsngewthuh bakla ïa ka jingkren jong u hapoh ïingdorbar haba ïadei bad ka jingpynlong ïa ka Tura kum ka Nongbah Tlang (Winter Capital) jong ka Jylla.
U Shira u la mudui ar tylli ki mukotduma pynjah burom pyrshah ïa ka Mikkanchi R. Sangma na Darangiri, Goalpara District, Assam bad u Balsrang Marak na Thapa Darenchi, North Garo Hills hakhmat ka Ïingbishar Chief Judicial Magistrate, Shillong.
“Nga la mudui ïa ka mukotduma pynjah burom (Defamation Case) bad mukotduma kam runar (Criminal Case) pyrshah ïa 2 ngut ki briew. Ki la pynsaphriang hapoh ka rynsan lad pathai ‘YouTube’ halor ka jingkren jong nga hapoh Ïingdorbar Thawaiñ haba ïadei bad ban pynlong ïa ka Tura kum ka Nongbah Tlang,” ong u Shira haba kren sha ki lad pathai khubor.
Haba kdew ba kitei 2 ngut kim shym la sngewthuh ïa ka jingkren jong u, u la ong, “Khlem da sngewthuh ïa ki jingtip ba bniah (halor kaei kaba nga la kren hapoh Ïingdorbar Thawaiñ), ki la pynpaw ha ka ‘YouTube’ ba nga pyrshah jur ïa la ka jaidbynriew, nga pyrshah jur ban pynlong ïa ka Tura kum ka Nongbah Tlang bad kumta, u la ong ba u pynrem ïa nga namarba ngam shym la ïatreilang bad ka jaidbynriew.”
Na ka liang u nongsaid aiñ u Shira, u la ong “Mynta ka sngi, ngi la mudui ar jait ki mukotduma pynjah burom – kawei ka ‘Civil’ bad kawei pat ka ‘Criminal’. Ha ka ‘Criminal Defamation’, lada kim lah pynshisha ïa ki jingkynnoh jong ki, kata kin shah pynshitom katkum ki kyndon aiñ bad ngi la mudui ruh ïa ka mukotduma bai mynraiñ khmat kaba mar T.100 klur na ki. Kane ka dei namarba ki la pynsngewthuh bakla ïa kaei kaba u ‘Client’ jong nga, u Symbud Lamphang u la kren hapoh Ïingdorbar Thawaiñ.”
“Kawei na kiba shah mudui ka dei na Assam bad kam don jingïadei eiei bad ka Meghalaya. Ma ka ruh ka la pynsngewthuh bakla ïa ka jingkren jong u (Shira) kaba u la kren hapoh Ïingdorbar Thawaiñ ha ka rukom kaba pher – kaba la pynjah burom ïa u ‘Client’ jong nga ha konstitwensi jong u, ha Ri-lum Garo bad ha ka Jylla baroh kawei. Namar kane, u la sngewsih shi kat dei halor ka jingleh jong kine 2 ngut bad namarkata u la kynjoh ïa kane ka ïingbishar mynta ka sngi da kaba mudui ïa kine 2 tylli ki mukotduma pynjah burom,” u la ong.
Haba jubab, u la ong, “Kaei kaba u ‘Client’ jong nga, u Symbud Lamphang u la kren hapoh Ïingdorbar Thawaiñ, halor kane, ki la shna ïa ka dur khih ha kaba ki la don katto-katne ki jingkynnoh pyrshah ïa u. Kine ki jingkynnoh pyrshah ïa u ‘Client’ jong nga katkum ka jingsngewthuh jong u ki long kiba bakla – baroh kaei kaba ki la pynsngewthuh. Kumta namarba kane ka kam ka la don hapoh ïingbishar kan ym ïahap ïa ngi ban ai shuh ïa ki jingtip nalor kane.”
Shuh shuh u la pynshai ba uwei ne kine u dei u ‘Youtuber’ na Ri-lum Garo katba kawei pat ka dei tang ka nongpyndonkam ïa ka rynsan lad pathai na Assam.
Nalor u nongsaid aiñ u Shira, Sujit Dey, la synran lang ïa u Symbud Lamphang ha kane ka sngi da 2 ngut ki MLA ka NPP, Marthon Sangma (Mendipathar) bad Rupert M. Momin (Kharkhutta).
