Shillong, Lber 13
U Symbud Myntri Rangbah ka Jylla, Bah Prestone Tynsong, u la ïathuh ba ka Sorkar ka la dep siew haduh 97.5 percent ka bai jaka sha ki trai jaka ban shna ïa ka surok Western Shillong by-pass katba 2.5 percent ka dang sahkut namar ka don ka jingïakam ïa ka jinglong trai.
Ïa kane ka jubab u Bah Prestone u la pyntip ha ka sngi kut jong ka dorbar mang tyngka kaba la long ha ka Sngi Palei ha ki kynta kylli jingkylli ba la buh da u Dr. Mukul Sangma u Nongïalam ka Liang Pyrshah bad jingkylli bynrap pat da u MLA ka Nongkrem Bah Ardent Basaiawmoit.
U Bah Prestone u la ïathuh ba kine ki 2.5 percent kiba dang sahkut ka dei namar haba la pyllait pisa sha ki trai jaka riewshimet la wan kam sa uwei pat.
Shuh shuh u la ïathuh ba don ki jaka jong ka kur haba la dep pyllait pisa ha u kñi kur, ka wan sa kawei ka kynhun ban kynnoh ba utei uba la dep pyllait pisa um dei u kñi kur ba shisha.
Kumta u la pyntip ba ka ophis Deputy Commissioner kan sa khot ïa baroh ar liang mamla ban pynbeit ïa kine ki 2.5 percent kiba dang sahkut.
Shuh shuh u Bah Prestone u la pyntip ba ka Sorkar ka la pynlut pisa haduh shispah arphew wei klur sawphew lak hynriew phew lai hajar hynñiewspah shi tyngka ban siew bai jaka lyngba ka Ri-Bhoi district bad sawspah sanphewsan klur laiphew khyndai lak laiphew saw hajar hynñiewspah sanphew ar tyngka ban siew bai jaka lyngba ka East Khasi Hills district.
Ha kawei pat ka jingkylli, u MLA ka Mawryngkneng u Bah Heavingstone Kharpran u la pyntip ba la bunsien ki shipai ki ju pynthut ïa ka jingtrei ki briew ka jylla ha kaba u la pan ïa ka jubab kaba shai na u Bah Prestone ba un pynthikna ban leh eiei halor kane khnang ba nangne shakhmat ki shipai kin nym pynthut shuh ïa ki paidbah.
U Bah Kharpran u la buh jingkylli ruh, hato ka surok na Happy Valley sha Mawshbuit ka dei ne em ka jaka jong ka tnat shipai?
U Bah Heavingstone u la ïathuh ba dang ha kine ki khyndiat sngi haba ka tnat PWD ka dang pyntrei ban maramot ïa kane ka surok, ki shipai ki la wan ban pynsangeh ïa ki.
Haba jubab ïa kane u Symbud Myntri Rangbah u la ong ba ka surok ka dei ba la long trai da ka tnat PWD hynrei ïa ka bynta kaba 600 meter ka dei ba la long trai da ki shipai naduh u snem 1972 ba la lap na ki kot ki sla.
U la ïathuh ba ka Deputy Commissioner ka la pynlong ïa ka jingïalang halor kane ha ka 13 tarik u Rymphang namar ki shipai ki kam ba katei ka surok ka dei ka jaka jong ki da kaba kam ba ka jingpyntrei ka la tam ïa ka 600 meter, kumta u la ïathuh ba kane ka jingïalang ka la seisoh ha kaba ki shipai ruh ki la shah biang ban maramot ïa kane ka surok.
U Symbud Myntri Rangbah u la ong ruh ba un sa shong jingïalang biang ha kine ki taïew ban wan ban ïakren halor kane.
