Shillong, Lber 13
Ka Drug Reduction Elimination & Action Mission (DREAM) kaba dei ka prokram jong ka Sorkar Jylla ban ïakhun pyrshah ïa ka jingdih bad jingkhaïi drok ha ka Jylla, ha ka 13 tarik u bnai Lber, 2025, ka la pynlong ïa ka jingïalang ïamir jingmut hapdeng ki Rangbah Shnong, nongïalam shnong jong ki shnong bapher-bapher, ki nongseng ïa ki jaka ai sumar ne ki ‘Rehabilitation Centre’ bad ki nongïasyllok ne ki ‘Counsellor’ ban ïathir-ïatai halor ka jingma jong u drok ha ki shnong-ki thaw bad ban wad ruh ïa ki jubab ha ka ban rat dyngkhong ïa u drok hapoh ka Jylla.
Ïa katei ka jingïalang la pynlong ha ka kamra jingïalang jong ka ophis treikam ka Social Welfare kaba don ha Lachumiere, Shillong ha ryngkat ka jingïadonlang u Mission Director ka DREAM, u Bah Francis Kharshiïng bad u Superintendent of Police ka East Khasi Hills District, u Bah Vivek Syiem.
Ha katei ka jingïalang, ka la don ruh ka jingpynsngewthuh, ka jingai jingmut bad ka jingpynsngew ïa ki jingeh ha ki dong-ki shnong ba kum ki nongïalam shnong ki mad ha ka ban tehlakam ïa u drok.
Haba kren ha katei ka sngi, na ka liang u Bah Vivek u la ong, u khynnah ha shwa ba un ngop ha ka jingdih ïa u drok, bunsien u ju ngop shwa da kaba dih ïa u duma bad u kynja bad nangta pat kan sa kiew sha ka jingmad ïa u drok.
U la ong ba kum ki bor shnong-ki thaw ki donkam ban ïatreilang bad ki bor pulit ban tehlakam ïa u drok da kaba bynrap ruh ba ki don katto-katne ki shnong kiba ym kwah ban mih shakhmat hadien ka jingïoh kurup jong ki ïa u drok na ki shnong-ki thaw namarba kim kwah satia ban leit mih sha ki bor pulit ne wat sha ki ïingkashari namar ka jingshah pynbunkam shaba palat hynrei kane ka jingkiar jong ki nongsynshar shnong kan nym lah satia ban rat dyngkhong ïa u drok.
Ha katei ka jingïalang, ka la mih ruh ka jingkylli na uwei u ‘riew rangbah jong kawei ka shnong uba la buh ïa kawei ka jingkylli, balei ym lah ban leh ei-ei ïa ki briew kiba dei ki nongkhaïi drok kiba heh hapoh ka Jylla?
Haba jubab halor kane ka bynta, u Bah Vivek u la ong ba ïa kitei ki nongkhaïi drok la pynngat ha ka Narcotic Drugs and Psychotropic Substances (NDPS) Act, 1985, bad da ka jingïatreilang bad ka kynhun Anti Narcotic Task Force (ANTF) ruh ka la don ka jingshimkhia kaba jur bha ha ka ban rat dyngkhong ïa u drok napoh ka Jylla.
Shuh-shuh, na ka liang ki Rangbah Shnong ki la ai jingmut ha katei ka jingïalang ba khnang ba yn pyllait ïa ki samla bad ki khynnah na ka jingkyrni ha ka ban dih ïa u drok, ka donkam ban buh ïa ki jingïalehkai pynbyrngia ha ki shnong-ki thaw nalor kiwei-kiwei ki jingai jingmut.
