Shillong, Lber 13
U Myntri ka Sorkar Pdeng ba khmih ïa ka tnat Science & Technology, u Dr Jitendra Singh ha ka Sngi Palei u la plie ïa u mawnongrim na ka bynta ban tei ïa ka North East Center for Technology Application and Reach (NECTAR) ha Umsawli, New Shillong.
Kane kan dei ka sien jam ban ïaid shakhmat lyngba ka NECTAR khamtam haba ïadei bad ki kam kiba thymmai bad ki kor-ki bor jong kane ka juk ba mynta ha ki thaiñ jong ka shatei lam-mihngi ka Ri.
Ka jingtei ïa ka ophis NECTAR la buh thong ban pyndep hapoh ka 2-3 snem bad ka jingtrei kan sdang noh shen.
Haba kren bad ki nongthoh khubor hadien ba la dep ban plie paidbah ïa u mawnongrim, u Dr Jitendra Singh u la ong ba kane ka jaka kan peit bad khmih ïa baroh kawei ka thaiñ shatei lam-mihngi ka Ri da kaba ai jinghikai lyngba ki kor-ki bor jong kane ka juk sha kito kiba seng kam-seng jam, bad ruh na ka bynta ki Mission bapher-bapher kum ka Mission Honey bad ka Mission Bee.
U don ruh ïa ka jingkyrmen kaba khraw ba ka thaiñ shatei lam-mihngi kan long kawei ka ‘Saffron hub’ jong ka India hadien ka Jammu bad Kashmir.
“Nga sngewkmen shikatdei eh ba mynta ka sngi ba ngi la buh ïa u mawnongrim ban tei ïa ka ophis treikam bad kane kan dei ka jaka ka ban khmih bad peit ïa baroh ki Jylla kiba don shatei lam-mihngi ka Ri”, ong u Myntri.
U la bynrap da kaba ong ba u Myntri Rangbahduh ka Ri, u Narendra Modi u la dep pynbeit ban rah ïa ki artylli ki jaka kata ka Jammu & Kashmir bad ki Jylla kiba don shatei lam-mihngi ka Ri ba kin poi sha kajuh ka kyrdan kumba long lem kiwei.
Ha kane ka sngi, la ïadonlang ruh da u Director General ka NECTAR, u Dr. Arun Kumar Sarma, ki ophisar jong kane ka shlem kiba dei na ki Jylla bad na Sorkar Pdeng, ki kynhun kiba don bynta nalor kiwei-kiwei.
