Shillong, Lber 13
Ka International Seminar on Emerging Research Trends in Computer Science (Isert-cs) ba la pynlong da ka Department of Computer Science, ka St. Anthony’s College ryngkat ka jingkyrshan na ka State Council of Science and Technology & Environment bad ka National Thermal Power Corporation jong ka North Eastern Electric Power Corporation Limited ka la pynlong ïa ka seminar ba ar sngi kaba la sdang naduh ka 12 tarik u Lber bad ka la pynkut noh ha ka sngi palei ka 13 tarik Lber 2025.
Kane ka seminar jong ka National Education Policy (NEP) 2020, ka la ïaid ryngkat bad ki thong ha kaba kyntiew ïa ka internship, jingwad bniah, bad jingtip shaphang ka kam karkhana na ka bynta ki samla pule.
Kane ka dei ka lad kaba ai jingmyntoi ïa ki nongshim bynta ban ïamir jingmut bad ïa peit shaphang ki jingpynkylla ha ka jingpule ia ka Computer Science.
Ha kane ka seminar ki la don ki nongkren na sawdong ka pyrthei, ki ‘riew shemphang bad ki nongwad bniah na ki jaka pule kiba pawnam, ki tnat treikam Sorkar, bad ki kynhun saiñ pyrthei kiba la ai jinghikai halor ka cyber-security, ka artificial intelligence, ka quantum computing, ka robotics, bad ka geospatial analytics.
Kane ka seminar ka la long ka lad ba khraw na ka bynta ki nongwad bniah, ki samla pule, bad ki tnat treikam Sorkar ban ïa pyrkhat bad ïa peit bniah shaphang ki jingpynkylla thymmai ha ka AI, Cyber-security, robotics, space technology, bad ka jingpyntreikam ïa ki jingstad ha ka synshar khadar bad ka pule puthi.
Ka iSERT-CS 2025 ka la pynshisha ïa ka jingangnud jong ka St. Anthony’s College ban kyntiew ïa ka jingstad bad jingpule Computer Science, bad ka la buh ïa ka rynsan na ka bynta ki jingïatreilang ha ki prokram jingwad bniah ha ki sngi ban sa wan.
