Shillong, Lber 13
Ka shlem treikam jong ka Deputy Commissioner, East Khasi Hills District ka la phah ïa ka jingpyntip ba ki paidbah ki dei ban pynïasoh ïa u Aadhaar number bad ki skhim bapher-bapher kiba la pynbna da ka Sorkar Pdeng ne Sorkar Jylla.
Ha ka jingpynbna ka DC ka la pyntip ba bun na ki skhim kiba ka sorkar pdeng ka ai sha ki paidbah kum ka skhim sam jingbam lyngba ka Integrated Child Development Service (ICDS), ka POSHAN 2.0, CM care Pension, Pradhan Mantri Awas Yojna (G) ne ka skhim shna ïing, ka bai bam na bynta ki samla pule, ka Megha Health Insurance Scheme (MHIS) card, ka jingtrei 100 sngi ne Mahatma Gandhi National Rural Employment Guarantee Act (MGNREGA), khaw ration, NSAP ka skhim bai bam tymmen, ban ïoh LPG ne ki tyndong shet jingshet bad kiwei-kiwei skhim ki donkam ban pynïasoh bad u Aadhaar. Kumta ka la bthah ïa baroh ki paidbah kiba khlem pat don ïa u Aadhaar card ba kin leit ban shon ha ka shlem treikam ka Deputy Commissioner ha Shillong ne shlem treikam Block Development officers (BDO) ne ïing dak ne ki jaka ba la pynbeit kyrpang bad ki dei ruh ban rah ïa ka dur thep vote ne syrnot sngi kha.
Na ka bynta kiba hapoh 15 snem ka rta donkam ban don ïa ka syrnot Schedule Tribe ne ka syrnot sngi kha bad ka Adhar Card jong ki kmie ki kpa.
Na ka bynta kito kiba la don ïa ka Aadhar card ki dei ban leit pynïasoh ïalade bad kitei ki skhim bad ka Aadhar card.
