Shillong, Lber 13
Ka jingshah tuh jong ki kali, arshaka bad ka jingshah prong tuh jong ki ïing ki sem ka dang ïai bteng na kawei ka sngi sha kawei. Kane ka la pynlong haduh ba ka la wanrah ïa ka jingbym shngaiñ shuh ïa ki trai ïing ne ki trai kali.
Katkum ka khubor na ki pulit la ong ba u Mithe Chettri u la ai ka jingujor ba ha ka miet jong ka 11 tarik mynta u bnai, ki runar bym lah ban ithuh ki la tuh ïa ka kali pick-up trok ka jong u, kaba don ïa u registration number ML05-AB-2541 na ka jaka pynïeng kali ha Anjalee, Shillong.
Ha kawei pat ka khubor, ka Jayanti Das ka la ujor sha ki pulit ba ha ka 12 tarik mynta u bnai, ki runar bym lah ban ithuh ki la prong tuh hapoh ka ïing ka jong ka, kaba don ha Pynthorumkhrah, Shillong bad ban rah tuh ïa ki tiar ksiar bad rupa kiba shongdor haduh kumba 78,000 tyngka bad ka pisa kaba long 12,000 tyngka.
Na ka liang jong u Mathiush A Marak pat u la ujor sha ki pulit ba hapdeng ka miet jong ka 12 bad 13 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-S-2412 na ka phyllaw ïing ka jong u ha ka shnong Dalia kaba hap hapoh ka thanat Shella ha East Khasi Hills.
U Nurul Hoque ruh u la ujor sha ki pulit ba ha ka miet jong ka 11 tarik mynta u bnai, ki runar bym lah ban ithuh, ki la tuh ïa ar tylli ki kor computer bad kawei ka UPS na ka Magurmari Govt., Girls UP School ha West Garo Hills.
Kumjuh, na ka liang jong u Walseng G Momin u la ai ka jingujor ba ha ka 12 tarik mynta u bnai, ha ka por kumba 4 baje janmiet, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML13-A-6891 na ka ïew ba shisien shi taïew ha Bajengdoba ha North Garo Hills.
Ha kawei pat ka khubor, na ka liang jong u Assistant EE ka MePDCL, Mendipathar Revenue Sub-Division u la ujor sha ki pulit ha ka 5 tarik mynta u bnai ba ki runar bym lah ban ithuh ki la tuh saw tylli ki HT poles, laiphew lai tylli ki disc insulators, arphew san tylli ki pin insulators, bad kiwei kiwei ki tiar na kiba bun ki jaka kiba don hapdeng ka Dainadubi bad 7th Mile ha North Garo Hills.
