Shillong, Lber 13
Ka North Eastern Hills University Teachers’ Association (NEHUTA) ka la kynthoh pyrshah ïa u Vice-Chancellor ka NEHU, Prof. Prabha Shankar Shukla da kaba ong ba u VC u la pyndonkam bakla ïa ka bor ha ka jingpynïaid ïa ka skulbah bad ruh u la pynjah burom ïa kane ka skulbah ha ka liang ka pule ka puthi.
Ha ka kyrwoh na u President ka NEHUTA, Prof. Lakhon Kma u la ong ba u Prof. Shukla u la leh marwei da kaba thung kam ïa ki briew kiba dei tang na kawei ka jaka khlem da ailad ïa ki trai shnong na ka Jylla ne kiba na ka thaiñ shatei lam mihngi. U la kynthoh ruh halor ka jingthung kam ïa u Registrar, Deputy Registrars bad ki nonghikai kaba la wanrah ïa ka jingpyrshah kaba jur da kaba kynnoh ba kim pat long kiba tbit.
“Nalor ba u leh shiliang khmat, u Shukla um don ka jingkitkhlieh bad ka jingbym burom ïa ki kyndon jong ka skulbah, bun ki professor kiba dei hok ki la shah kyntait ban kiew kyrdan,” u la ong.
U Prof. Kma u la ong ruh ba ka Skulbah mynta ki jingtei ki la dang sniew hynrei ïa ka pisa kaba ki dei ban pynlut ha kine ki jingtei la pyndonkam bakla da u VC.
U Prof. Kma u la ong ruh ba u VC ha ka por ba u wan shimti ïa ka kam u la kular ban thung ïa ki Pro-Vice-Chancellor na ka bynta ka Shillong bad Tura hynrei um shym la lah ban pyndep ïa kine ki jingkular mynta la lai snem. “U Prof Shukla u long pyrshah ïa ki trai shnong, khamtam ha kaba ïadei bad ka rukom thung kam thung jam bad ka jingleh shiliang khmat ïa ki samla pule bad ki nonghikai na ka Jylla,” u la ong.
Ka Ministry kaba khmih ïa ka pule-puthi ka la thaw ïa ka committee ban khmih bniah ïa ki jingkynnoh pyrshah ïa u Prof Shukla, “katkum ka kaiphod na ka National Commission for Scheduled Tribes (NCST) ka la pynthikna ba ïa ki jingkynnoh pyrshah ïa u Prof. Shukla la shim khia bha, ha kaba ïa ki jinglap jong kane ka committee la sdang bishar bniah mynta,” u la ong. U Prof. Kma u la pynpaw ka jingsngewdiaw halor ka jingbym ïoh jingtip ba pura jong ka jingtohkit, kaba la pynlong ba kan don ka jingsngew artatien.
U Prof. Kma u la ong ba wat la u Vice-chancellor u la pynjlan ïa ka shuti la palat 130 sngi, hynrei u Prof. Shukla u la kam ba u la sdang biang ïa ka kam na Delhi. “Ki samla pule bad ki nonghikai ngi pynpaw ka jingpyrshah bad ngi kyntait ïa kane ka jingkam ka jong u, namar ka jingdon jong u ka la pynsniew dur ïa ka jinglong-jingman jong kane ka skulbah,” u la ong.
“Ki samla pule bad ki nonghikai ngi dang ap ïa ka jingmih na ka jingtohkit bad ka jingkylli kaba mih, hato la u Prof. Shukla un shah pynshitom na ki jingleh ki jong u ne kan shu kut la ka kut ka jinglong Vice-Chancellor jong u tang ha ki jingïakhih?,” u la pynkut.
