Shillong, Lber 14
Ka Election Commission of India (ECI) ka khot bad wer ïa baroh ki seng saiñ pyrthei jong ka ri bad Jylla kumjuh ban wan shakhmat bad ki jingai jingmut hapoh ka 30 tarik u Ïaïong, 2025 na ka bynta kino-kino ki jingeh ki bym pat pynbeit ha ka kyrdan ERO, DEO ne CEO.
Ha ka shithi shimet kaba la phah sha ki seng saiñ pyrthei ha ka Sngi Ba-ar, ka ECI ka thmu ruh ban ïakren bad ki President lem bad ki dkhot ba rangbah jong ki seng saiñ pyrthei, ha ka por kaba ïabiang lang, kum shi bynta ban pynkhlaiñ shuh-shuh ïa ki rukom jied nongmihkhmat katkum ka aiñ ba la buh.
Hashuwa, ha ka jingïalang jong ka ECI ha ka taïew ba la dep, u Chief Election Com-missioner, Gyanesh Kumar u la bthah ïa ki CEO, ki DEO bad ki EROS jong baroh ki Jylla/UT ban pynlong ïa ki jingïakren na ka por sha ka por bad ki seng saiñ pyrthei, ban pynbeit ïa kino-kino ki jingai jingmut ba la ïohpdiang lyngba kine ki jingïalang da kaba bud pyrkhing hapoh ka aiñ (ba la don lypa) bad ban aiti ïa ka kaiphod halor ki sienjam ba la shim sha ka ECI hapoh ka 31 tarik Lber, 2025.
Na ka liang ka ECI ka la kyntu ruh ïa ki seng saiñ pyrthei ban pyndonkam ïa kane ka rukom treikam kaba ïasam ïa ka bor shim rai bad jingkitkhlieh ha ki kyrdan bapher-bapher.
“Ki seng saiñ pyrthei ki long kawei na ki nongshim bynta ba kongsan napdeng ki 28 tylli ki nongshim bynta ba la pynithuh da ka ECI katkum ka Riti Synshar bad ka jingpynwandur katkum ka aiñ kaba kynthup lut ïa baroh ki bynta jong ki rukom jied nongmihkhmat. Ka ECI ha ka shithi sha ki seng saiñ pyrthei ka la kdew ruh ba ka ‘Representation of People Act 1950 & 1951’; ‘Registration of Electors Rules, 1960’; ‘Conduct of Election Rules, 1961’; ki hukum bad jingbthah jong ka ïingbishar ba ha khliehduh ka ri, ki ‘Manual’ bad ‘Handbook’ ba la pynmih da ka ECI na ka por sha ka por ki la pynlong ïa ka jingïasam ïa ka bor shim rai bad jingkitkhlieh ha ki kyrdan bapher-bapher, ka jingkhlaiñ bad ka saiñdur aiñ kaba khuid bad shai na ka bynta ban pynlong ïa ka ilekshon kaba laitluid bad kaba hok,” ong u Director, Anuj Chandak ha ka kyrwoh khubor.
