Khliehriat, Lber 14
Ka District School Education Officer (DSEO), East Jaiñtia Hills District ha ka 11 tarik Lber ka la pynlong da ka District Level Science, Mathematics & Environment Exhibition na ka bynta ki khynnah Secondary School halor ka phang “Science and Technology for Sustainable Future” ha Jaiñtia Eastern College (JEC), Khliehriat.
Ha kane ka sngi la donlang ka Assistant Soil & Water Conservation Officer ka East Jaiñtia Hills District ka Kong R Laloo, Assistant Professor, Jaiñtia Eastern College, u Nishwa Rymbai, Block Technology Manager Agriculture Department, East Jaiñtia Hills District, ka Kong Academy Sutnga, Special Educator, East Jaiñtia Hills District Salanbor Kamar, nalor ki nonghikai bad khynnah skul.
Ha kane ka jingpyni nam la sakhi ïa ka jingïashim bynta jong ki khynnah na ki skul bapher bapher ka district bad la pyni ïa ki phang bapher bapher kiba kynthup ka buit treikam ban pynduna ïa ka jingbun ka Sulphur-dioxide and Nitrogen oxide ha ka lyer, ka jingim kaba koit ba khiah, ki jingbam, bad ka jingkhuid jingsuba na ka bynta ka jingim kaba kham bha nalor kiwei kiwei.
Hadien ka jingïalang, la sam ïa ki syrnot bad ki khusnam pisa sha ki nongjop bad la sam ruh ïa ki jingkynmaw sha baroh ki skul kiba la ïashim bynta ha kane ka jingpyni nam.
Ka Tumpa Nath na ka Ambrose Memorial Secondary School, Khliehriat kala wan ba nyngkong ha kane ka Exhibition bud sa ka Mehek Ansari na ka Little Star Secondary School, Ladrymbai bad ka Baphindarisha Dkhar na Khliehriat Higher Secondary School, Khliehriat ka la ïoh ïa ka khusnam kaba lai.
