Shillong, Lber 14
U Myntri Rangbah ka Jylla, Conrad K Sangma u la kular ban leh da kaba tyngeh pyrshah ïa kito kiba pyntrei torti ban maramot ïa ka surok NH-6 lada don ba ujor da ka jingthoh.
Kane ka jingkren u Myntri Rangbah ka long hadien ba u MP ka Shillong, Dr Ricky AJ Syngkon u la dawa ban leh ïa ka ‘independent quality audit’ ha kaba ïadei bad ka jingmaramot ïa ka surok NH-6.
“Kano-kano ka jingsngewkhia bad jingujor kaba wan poi sha ka jingtip jong ngi da ka jingthoh, khlem pep ngin shim kam beit”, la ong u Conrad haba kren bad ki lad pathai khubor.
Ha kaba ïadei bad kane ka jingsngewkhia u MP, na ka liang u Myntri Rangbah u la kubur ba ym lah ban shu peit beit ïa kawei-pa-kawei ka jingpyntrei kaba dang ïaid, hynrei donkam ka jingkyrshan ruh na ki paidbah ban long kiba peitngor.
“Ki don da ki hajar tylli ki projek kiba dang ïaid ka jingpyntrei ha baroh kawei ka Jylla, la ka dei ki projek jong ka Sorkar Pdeng ne jong ka Sorkar Jylla. Hooid, don ki por ba ngim lah ban peit lut ïa man ki jingpyntrei ba dang ïaid. Kumta, ka jingkyrshan jong ki paidbah ka long kaba donkam. Kaei kaba donkam na ka liang jong ngi ka long ba kum ka Sorkar ngi dei ban shim kam haba ïoh ïa ki jingujor”, u la ong.
U Conrad u la kular ïa ki paidbah ba lada lap ïa kano-kano ka jingduna ne jingleh palat, kam pher mano ba donkti, bad haba ïohpdiang ïa ka jingujor da ka jingthoh dalade un shim kam tyngeh.
“Nga pynthikna ba lada lap eiei kampher lada dei uno-uno u briew, haba don ka jingujor bad haba ka jingpyntrei ka dei kaba torti, dalade ngan pynthikna ba ka tnat bad ka Sorkar kin shim kam bad leh eiei”, u la ong.
Na ka liang u Dr. Syngkon ha ka shithi sha u Myntri ka Road Transport and Highways, Nitin Gadkari, u la kdew shibun ki jingduna ha kaba ïadei bad ka jingmaramot ïa ka surok. U la pynpaw ba ka surok NH-6 ka dei ka lynti ïaid kaba kongsan bha na ka bynta ka khaïi-pateng, ki kam jngohkai ha ka thaiñ Shatei Lam Mihngi bad pynpaw ïa ka jingkhuslai halor ka jinglong jingman ba ka surok ka nang sniew.
U MP u la kdew ruh ba ha ka jingleit jurip ïa ka shnong Kuliang ha East Jaiñtia Hills, la shem ba ka rukom siang surok thymmai la leh torti bha ha kaba ïa ka rong lah ban shu khlong tang da ka kti.
