Shillong, Lber 14
U Bah Bindo M Lanong uba dei u kpa jong ka Kong Deity Majaw ka MDC ba dang shah jied na ka seng Voice of the People Party (VPP) na Malki-Laitumkhrah konstitwensi, u la ïathuh ba ka Kong Deity ka la kham khlaiñ mynta haba ka la shah sumar sha Apollo Hospital Guwahati.
Haba ïoh ban ïakren lyngba ka phone bad u Bah Bindo Lanong, u la ïathuh katkum ka jingpyntip ki doktor ka khun jong u ka lah ban ïoh mih noh na hospital ha ka Sngi Nyngkong ne Sngi Ba-ar lashem taïew hadien ba ka la kham khlaiñ.
U Bah Bindo u la ïathuh ba ki shong lai ngut hakhmat ka Kong Deity, u lok Bah Geoffrey Pohlong bad u nongñiah ïa ka kali uba na Malki haba ki leit donkam sha Ri Bhoi. Hynrei ynda ki la wanphai u nongñiah jong ka kali u la kynriah ïa ka ar shaka kaba la wan ïaid shakhmat hynrei u khlem poi pyrkhat ba ka kali kan poi sha nala kaba long kum ka thliew. Shuh shuh u la pyntip ba ka Kong Deity ka la shitom bha na ka kti namar kine ar ngut ki la ban ïa ka marwei namar ka la shong sha liang kadiang.
Kum ban shu pynkynmaw kane ka jingmynsaw jong ka Kong Deity Majaw ka dei namar ka kali ba ka shong ka la hap sha nala ha shnong Quinine, Ri Bhoi district kaba la jia ha ka janmiet jong ka 8 tarik u Lber 2025.
